पुणे : पुण्यात वैभवी गणेशोत्सवाला सुरुवात झाली आहे. मानाच्या तसेच सर्व गणेश मंडळाच्या गणेशोत्सवाची उत्सात प्रतिष्ठापणा करण्यात आली आहे. आज पुण्यात दीड दिवसांच्या गणपतीचे विसर्जन होणार आहे. दरम्यान, पुण्यात चोख सुरक्षा व्यवस्था ठेवण्यात आली असून पुढील ११ दिवस शहरात ड्रोन आणि इतर उडणाऱ्या वस्तू उडवण्यावर बंदी घालण्यात आली आहे. पुणे पोलिसांनी तसे आदेश जारी केले असून याचा भंग केल्यास थेट जेलची हवा खावी लागणार आहे.
पुण्यात गणेश उत्सवाच्या पार्श्वभूमीवर तब्बल ७ हजार पोलिसांचा बंदोबस्त ठेवण्यात आला आहे. पोलीस उपायुक्त (विशेष शाखा) यांनी ड्रोन उडवण्या संदर्भात बंदीचे आदेश दिले आहेत. त्यांनी दिलेल्या आदेशानुसार पुण्य पुढील ११ दिवस ड्रोन, रिमोट कंट्रोल, मायक्रो-लाइट, एअरक्राफ्ट, पॅराग्लायडर, पॅरामोटर, हँडग्लायडर, हॉट एअर बलून इत्यादींचा वापर करण्यास बंदी घालण्यात आली आहे. या माध्यमांचा वापर दहशतवाद्यांकडून दहशतवादी कारवायांसाठी केला जाऊ शकतो तसेच नागरिक आणि महत्वाच्या नागरिकांच्या सुरक्षेवर देखील समस्या निर्माण होऊ शकते.
यामुळे २९ सप्टेंबर पर्यंत ड्रोन उडवण्यावर बंदी घालण्यात आली आहे. फक्त शहर पोलीस पाळत ठेवण्यासाठी वापरत असलेल्या ड्रोन आणि उडत्या वस्तूंना या आदेशातून वगळण्यात आले आहे. या आदेशाचे उल्लंघन केल्यास थेट कारवाई केली जाणार आहे. भारतीय दंड संहिता (IPC) च्या कलम १८८ नुसार शिक्षा करण्यात येणार आहे, स्टेशन आणि इतर आस्थापनांना अधिकृत आदेश देण्यास सूचित करण्यात आले आहे. काही दिवसांपूर्वी पुण्यात दोन दहशतवादी सापडले होते.
त्यामुळे पुणे पोलिस अलर्ट मोड वर आहेत. उत्सव काळात गर्दीवर लक्ष ठेवण्यासाठी १ हजार ८०० सीसीटीव्ही कॅमेरे बसवण्यात आले आहे. या सोबतच पोलिसांनी मंडळांच्या कार्यकर्त्यांना मंडप परिसरात सीसीटीव्ही कॅमेरे बसविण्याचे सांगितले आहे.
संबंधित बातम्या