Pune Bus rape case: पुण्यातील स्वारगेट एसटी स्टँडवर बसमध्ये झालेल्या बलात्कार प्रकरणातील आरोपीला अखेर अटक

पोलिसांनी दत्तात्रय गाडे याला त्याच्या गावी जाऊन बेड्या ठोकल्या आहेत. आरोपीला ताब्यात घेऊन त्याला पुण्यात आणण्यात आले आहे. पुढील कायदेशीर कारवाईसाठी त्याला आज, शुक्रवारी न्यायालयात हजर करण्यात येणार असल्याची माहिती पाटील यांनी दिली.

आरोपी गाडे याच्याविरुद्ध अनेक गुन्हे दाखल

दत्तात्रय गाडे याच्याविरुद्ध यापूर्वी अनेक गुन्हे दाखल असल्याची माहिती आहे. बलात्काराच्या घटनेनंतर गाडे पुणे शहरातून पळून गेला होता. त्याने शिरूर येथे नातेवाईकाच्या घरात आश्रय घेतला होता. या मुक्कामादरम्यान त्याने चूक केल्याची कबुली देत आत्मसमर्पण करण्याची तयारी दर्शवली होती. मात्र, त्यावर कारवाई करण्यापूर्वीच तो गायब झाला. त्याच्या नातेवाइकाकडून मिळालेल्या माहितीच्या आधारे पोलिसांनी श्वानपथकाच्या मदतीने त्याचा शोध घेऊन त्याला अटक केली आहे. 

स्वारगेट एसटी स्टँडवर रिकाम्या शिवशाही बसमध्ये केला बलात्कार

पुण्यातील स्वारगेट हा महाराष्ट्र राज्य मार्ग परिवहन महामंडळाचा (एमएसआरटीसी) सर्वात मोठा बस डेपो आहे. या घटनेतील पीडितेने दिलेल्या माहितीनुसार, मंगळवारी पहाटे पावणेपाचच्या सुमारास ती सातारा जिल्ह्यातील फलटणला जाणाऱ्या बसची एका प्लॅटफॉर्मवर वाट पाहत असताना गाडे याने तिला ‘ताई’ असे संबोधत साताऱ्याकडे जाणाऱ्या बस दुसऱ्या प्लॅटफॉर्मवर आल्याचे सांगितले.

बसस्थानकाच्या आवारात इतरत्र उभ्या असलेल्या रिकाम्या शिवशाही एसी बसमध्ये तो तिला घेऊन गेला. बसमधील दिवे चालू नसल्याने ती आत जाण्यास कचरत होता. परंतु हीच बस फलटणला जाणार असल्याचे गाडेने तिला पटवून दिले. त्यानंतर गाडे याने तिचा पाठलाग करून तिच्यावर बलात्कार केला, अशी माहिती वैद्यकीय क्षेत्रात काम करणाऱ्या महिलेने पोलिसांना दिली.