Puja Khedkar: अटकपूर्व जामिनासाठी पूजा खेडकरची दिल्ली हायकोर्टात याचिका, उद्या सुनावणी!

खेडकर यांनी आरक्षणाचा लाभ मिळविण्यासाठी यूपीएससी नागरी सेवा परीक्षा २०२२ साठी केलेल्या अर्जात चुकीची माहिती दिल्याचा आरोप आहे. ३१ जुलै रोजी संघ लोकसेवा आयोगाने खेडकर यांची उमेदवारी रद्द करून त्यांना भविष्यातील परीक्षांपासून वंचित ठेवले होते. १ ऑगस्ट रोजी येथील सत्र न्यायालयाने तिला अटकपूर्व जामीन नाकारला होता आणि तिच्यावर गंभीर आरोप असून त्याची सखोल चौकशी होणे गरजेचे असल्याचे म्हटले होते.

Bachchu Kadu: दिव्यांगांना फसवलं, बच्चू कडू यांनी अधिकाऱ्याच्या कानशिलात लगावली!

या प्रकरणी अटक न झालेल्या खेडकर यांनी तात्काळ अटकेची धमकी असल्याचे सांगत सत्र न्यायालयात धाव घेतली होती. हा सगळा कट उलगडण्यासाठी आणि कटात सहभागी असलेल्या इतर व्यक्तींचा सहभाग सिद्ध करण्यासाठी आरोपींची कोठडीत चौकशी करणे आवश्यक आहे, असे सांगून सत्र न्यायालयाने म्हटले होते की, हे प्रकरण केवळ हिमनगाचे टोक आहे. अलीकडच्या काळात शिफारस केलेल्या उमेदवारांनी बेकायदेशीररित्या अशा प्रकारचा लाभ घेतला असावा आणि यूपीएससीतील काही अंतर्गत व्यक्तींनीही खेडकर यांना मदत केली होती का? याचा शोध घेण्यासाठी तपास निष्पक्षपणे करण्याचे निर्देश न्यायाधीशांनी दिल्ली पोलिसांना दिले होते.

खेडकर यांना या प्रकरणात खोट्या पद्धतीने अडकवण्यात आल्याचा आणि मीडिया ट्रायलला बळी पडल्याच्या दाव्याला उत्तर देताना सत्र न्यायालयाने म्हटले होते की, ‘रेकॉर्डवर पुरेसे आक्षेपार्ह साहित्य असल्याने हा युक्तिवाद योग्य नाही. हे षड्यंत्र पूर्वनियोजित पद्धतीने रचण्यात आले आहे. हा कट आरोपींनी अनेक वर्षांपासून अंमलात आणला होता. एकट्या आरोपीला बाहेरच्या व्यक्तीच्या किंवा अंतर्गत व्यक्तीच्या मदतीशिवाय हा कट रचता आला नसता.’

देशात महत्त्वाच्या प्रवेश परीक्षांसंदर्भातील पेपर फुटीची अनेक प्रकरणे नुकतीच समोर आली असताना केंद्रीय लोकसेवा आयोग अर्थात यूपीएससीशी संबंधित आणखी एक मुद्दा लवकरच चर्चेत येईल, याची नागरिकांना कल्पना नव्हती. यूपीएससीने महाराष्ट्र कॅडरच्या २०२३ च्या बॅचच्या आयएएस अधिकारी पूजा मनोरमा दिलीप खेडकर यांची उमेदवारी रद्द केली आणि आयोगातर्फे घेण्यात येणाऱ्या भविष्यातील सर्व परीक्षांमधून त्यांना वगळण्यात आले. खेडकर यांनी आपल्या खासगी गाडीवर लाल आणि निळ्या दिव्याचा वापर केल्यानंतर हे प्रकरण उजेडात आले.