Chandrapur Accident : चंद्रपूर येथे भीषण अपघात; चालकाला डुलकी लागल्याने बस उलटली; २ ठार, १७ जखमी
Chandrapur Bus Accident Today : चंद्रपूर येथे विरूर-धानोरा मार्गावर शुक्रवारी मध्यरात्री एक खासगी बस पलटी झाल्याने भीषण अपघात झाला. यात २ प्रवासी जागीच ठार झाले तर तब्बल १७ जण जखमी झाले आहेत.
चंद्रपूर : चंद्रपूर येथे एका बस चालकाला डुलकी लागल्याने भीषण अपघात झाला आहे. शुक्रवारी मध्यरात्री हा अपघात झाला आहे. प्रवाशांना घेऊन हैदराबादला जाणारी एक खासगी बस ही शुक्रवारी मध्यरात्री विरुर- धानोरा मार्गावर पलटली. या अपघातात २ प्रवाशांचा जागीच मृत्यू झाला आहे. तर १७ जण गंभीर जखमी झाले. यातील काही प्रवाशी हे गंभीर असल्याची माहिती मिळत आहे.
पोलिसांनी दिलेल्या महितीनुसार हा अपघात चंद्रपूर जिल्ह्यातील राजुरा तालुक्यात येणाऱ्या विरूर- धानोरा मार्गावर घडला. एक खासगी बस प्रवाशांना घेऊन हैद्राबाद येथे जात होती. गाडीत तब्बल ३० ते ३५ च्या वर प्रवासी होते. मध्यरात्रीच्या सुमारास ही बस जात असतांना अचानक चालकाचे बसवरील नियंत्रण सुटले आणि ही बस रस्त्यावर पलटी झाली. या घटनेत दोन प्रवाशांचा जागीच मृत्यू झाला तर १७ ते १८ प्रवासी जखमी झाले. यातिल काही प्रवासी हे गंभीर असल्याचे सांगितले जात आहे.
अपघाताची माहिती मिळताच स्थानिक नागरिक घटनास्थळी पोहचले. त्यांनी या अपघाताची माहिती पोलिसांना दिली. पोलिसांनी घटनास्थळी येत स्थानिकांच्या मदतीने जखमींना बसमधून बाहेर काढत त्यांना रुग्णालयात दाखल केले. काही जखमींना राजुरा तर काहींना चंद्रपुरातील रुग्णालयात दाखल करण्यात आले आहे. या घटनेची नोंद पोलीस ठाण्यात करण्यात आली असून पुढील तपास सुरू आहे.
