पोलीस यंत्रणा ॲक्शन मोडवर.. बीडमध्ये मनोज जंरागेंसह ४२५ मराठा आंदोलकांवर गुन्हे दाखल

पोलिसांनी परवानगी नाकारल्यानंतरही बीड जिल्ह्यात २४ फेब्रुवारी रोजी २२ ठिकाणी रस्ता रोको आंदोलन करण्यात आले. मनोज जरांगे पाटील यांच्या आवाहनानुसार हे रस्ता रोको आंदोलन करण्यात आले होते. त्यावेळी काही ठिकाणी पोलीस आणि आंदोलकांमध्ये शाब्दिक बाचाबाचीही झाली होती. पोलिसांची परवानगी न घेता २२ ठिकाणी रस्ता अडवून सामान्यांना वेठीस धरण्यात आले होते. वाहनांच्याही लांबच लांब रांगा लागल्या होत्या. यामुळे सामान्यांना त्रास झाला होता. हाच धागा पकडून पोलिसांनी आंदोलकांवर गुन्हे दाखल केले आहेत. 

 मोठी बातमी, अखेर १७ दिवसानंतर मनोज जरांगे पाटील यांचे उपोषण मागे

मराठा आंदोलकांविरोधात बीड जिल्ह्यातील वेगवेगळ्या पोलिस ठाण्यांत २२ गुन्हे दाखल झाले असून जवळपास ४२५ हून अधिक आंदोलकांवर गुन्हे दाखल केले आहे. पाटोदा तालुक्यातील अंमळनेर व शिरूर पोलीस ठाण्यात मनोज जरांगे यांच्यावरही गुन्हा दाखल केला आहे. जरांगे यांच्या आवाहनानुसार हे आंदोलन झाल्याने त्यांच्याविरोधात गुन्हा दाखल झाल्याचे पोलिसांनी सांगितले. 

आज बीड जिल्ह्यात दुपारी १२ ते ५ इंटरनेट सेवा बंद करण्यात आली होती. अफवा पसरवल्या जाऊ नयेत म्हणून इंटरनेट सेवा खंडित करण्यात आली होती. संभाजीनगर व जालन्याच्या सीमा सील करण्याबरोबरच दोन्ही जिल्ह्यांकडे जाणाऱ्या बस सेवा बंद करण्यात आल्या होत्या. अनेक ठिकाणी पोलिसांनी नाकाबंदी केली होती.