विश्वकर्मा योजनेच्या वर्षपूर्तीनिमित्त पंतप्रधान मोदी आज वर्ध्यात; भूमिपूजन आणि उद्घाटनांचा धडाका

गेल्या वर्षी १७ सप्टेंबर रोजी विश्वकर्मा योजना सुरू करण्यात आली होती. तळागाळातील गरीब कारागिरांना आर्थिक मदत देण्याचा या योजनेचा उद्देश आहे. या योजनेच्या माध्यमातून १८ प्रकारच्या व्यवसायातील कारागिरांना मदत देण्यात येते. पंतप्रधान मोदी यांच्या हस्ते आज १८ कारागिरांना कर्ज वाटप केलं जाणार आहे. या कार्यक्रमात पंतप्रधान लाभार्थ्यांना प्रमाणपत्रे देखील देतील.

या योजनेच्या यशस्वी वर्षपूर्तीच्या निमित्तानं पंतप्रधान नरेंद्र मोदी आज स्मृती तिकिटाचं प्रकाशन करतील, अशी माहिती पंतप्रधान कार्यालायानं दिली आहे.

पीएम मित्र पार्कची पायाभरणी

पंतप्रधान अमरावती येथे पीएम मेगा इंटिग्रेटेड टेक्सटाइल रीजन अँड अ‍ॅपेरल (PM Mitra) पार्कची पायाभरणी करतील. महाराष्ट्र औद्योगिक विकास महामंडळ (MIDC) अंमलबजावणी एजन्सी म्हणून एक हजार एकर जागेत हे उद्यान विकसित करणार आहे. वस्त्रोद्योगाला चालना देण्यासाठी केंद्र सरकारनं ७ अतिरिक्त पीएम मित्र उद्यानांना मंजुरी दिली आहे.

पीएम मित्र पार्कमुळे थेट परकीय गुंतवणुकीसह (एफडीआय) मोठ्या प्रमाणात गुंतवणूक आकर्षित करण्यासाठी जागतिक दर्जाच्या औद्योगिक पायाभूत सुविधा निर्माण होतील आणि या क्षेत्रात नावीन्य पूर्ण आणि रोजगार निर्मितीला प्रोत्साहन मिळेल.

स्टार्टअपचा शुभारंभ

याशिवाय नरेंद्र मोदी आज महाराष्ट्र सरकारची 'आचार्य चाणक्य कौशल्य विकास केंद्र' आणि पुण्यश्लोक अहिल्यादेवी होळकर महिला स्टार्टअप या योजनांचा देखील शुभारंभ करतील.

पुण्यश्लोक अहिल्यादेवी योजनेमुळं महाराष्ट्रातील महिलांच्या नेतृत्वाखालील स्टार्टअप्सना सुरुवातीच्या टप्प्यात मदत मिळेल आणि २५ लाख रुपयांपर्यंत आर्थिक मदत दिली जाईल. यात मागासवर्गीय आणि आर्थिकदृष्ट्या दुर्बल घटकातील महिलांसाठी २५ टक्के विशेष तरतूद करण्यात आली आहे.