मराठी बातम्या  /  महाराष्ट्र  /  shirur loksabha: आढळराव पाटलांचा पत्ता कट! राष्ट्रवादी काँग्रेस लढवणार शिरूर लोकसभा; कोण असणार उमेदवार?

shirur loksabha: आढळराव पाटलांचा पत्ता कट! राष्ट्रवादी काँग्रेस लढवणार शिरूर लोकसभा; कोण असणार उमेदवार?

Ninad Vijayrao Deshmukh HT Marathi
Feb 28, 2024 11:57 AM IST

Shirur Lok Sabha News : शिरूर लोकसभा निवडणूक ही राष्ट्रवादी काँग्रेस अजित पवार गट लढण्याचे निश्चित झाले आहे. काल वर्षा बंगल्यावर या संदर्भात बैठक झाली. यानंतर ही जागा राष्ट्रवादीला दिली जाणार असल्याचे स्पष्ट झाल्याने शिवाजीराव आढळराव पाटील यांचा पत्ता कट झाल्याचे निश्चित झाले आहे.

Shivajirao Adhalrao Patil on shirur loksabha election
Shivajirao Adhalrao Patil on shirur loksabha election

Shirur Lok Sabha News : म्हाडाचे अध्यक्षपद देऊन शिवाजीराव आढळराव पाटील यांची बोळवण केल्याचे आता स्पष्ट झाले आहे. काल रात्री मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि अजित पवार यांच्या बैठकीत ही जागा राष्ट्रवादी काँग्रेस अजित पावर गटाला देण्याचे निश्चित झाले आहे. या बैठकीत राष्ट्रवादीचे राष्ट्रीय अध्यक्ष अजित पवार, प्रदेशाध्यक्ष सुनिल तटकरे, मंत्री दिलीप वळसे पाटील उपस्थित होते. तर शिवाजीराव आढळराव पाटील हे देखील यावेळी उपस्थित होते. शिरुर लोकसभेसाठी शिवाजीराव आढळराव पाटील, भाजपचे प्रदीप कंद आणि विलास लांडे तिकीट मिळवण्यासाठी इच्छुक आहेत. दरम्यान, राष्ट्रवादी काँग्रेस कुणाला तिकीट देणार या कडे लक्ष लागून आहे.

jaya prada : अभिनेत्री जया प्रदा फरार घोषित, मुंबईपासून हैदराबादपर्यंत शोधमोहीम सुरू

शिरूर लोकसभा जागेवरून गेल्या काही दिवसांपासून तिढा सुरू होता. ही जागा लढवण्यास अजित पवार गट आग्रही होते. तर शिवसेनेकडून माजी खासदार शिवाजीराव आढळराव पाटील हे देखील निवडणूक लढण्यास इच्छुक आहेत. एवढेच नाही तर ही जागा शिवसेनाच लढणार तसेच मुख्यमंत्र्यांनी या बाबत सांगितले असल्याचे देखील पाटील म्हणाले होते. मात्र, त्यांना मध्येच म्हाडाचे अध्यक्षपद देण्यात आल्याने त्यांचा पत्ता कट झाला अशी चर्चा सुरू होती. दरम्यान, यानंतर पाटील यांची भाषा देखील मवाळ झाली होती. मुख्यमंत्री जे सांगेल त्या पक्षाला पाठिंबा देईल अशी भूमिका त्यांनी घेतली होती.

Mumbai Water cut: मुंबईकरांनो, पाणी जपून वापरा! अनेक भागात पाणीपुरवठा ठप्प तर काही ठिकाणी कपात

दरम्यान, अजित पवार ही शिरूर लोकसभेच्या जागेसाठी आग्रही होते. या संदर्भात मंगळवारी रात्री वर्षा बंगल्यावर बैठक झाली. या बैठकीत ही जागा राष्ट्रवादी काँग्रेस लढवणार असल्याचा निर्णय घेण्यात आला आहे. बैठकी दरम्यान, एकनाथ शिंदे यांनी आढळराव पाटील आणि इतर नेत्यांना बाहेर ठेवून बंद दाराआड दिलीप वळसे-पाटील आणि अजित पवार यांच्याशी मुख्यमंत्र्यांनी चर्चा केली. दरम्यान, या नंतर शिवाजीराव आढळराव पाटील हे वर्षा बंगल्यावरुन बाहेर पडले. या बैठकीत ही जागा राष्ट्रवादीला देण्यास एकमत झाले. यामुळे आढळराव पाटील हे नाराज असल्याची चर्चा आहे.

राष्ट्रवादी काँग्रेसकडून कोण उमेदवार

शिरूर लोकसभा निवडणुकीत शरद पवार गटाकडून खासदार अमोल कोल्हे यांचे नाव जवळपास निश्चित झाले आहे. त्यांनी तयारी सुद्धा केली आहे. मात्र, आता अजित पवार गटाकडून उमेदवाराची शोधाशोध सुरू आहे. हवेली तालुक्यातील बडे नेते असलेले जिल्हा परिषदेचे माजी अध्यक्ष प्रदीप कंद यांनी भाजपला राम राम करून राष्ट्रवादी पक्षात प्रवेश केला आहे. त्यांना शिरूर मतदार संघातून उमेदवारी दिली जाणार असल्याची चर्चा आहे. तर विलास लांडे हे देखील या मतदार संघातून लढण्यास इच्छुक आहेत. तर शिवाजीराव आढळराव पाटील यांना घडयाळ चिन्हावर निवडणूक लढण्याची शक्यता देखील आहे.

IPL_Entry_Point