Mumbai NCB Raid : डोंगरी परिसरातून २० किलो मेफेड्रोन ड्रग्जसह कोट्यवधींची रोकड जप्त; महिलेसह तिघांना अटक

मुंबईतील डोंगरी परिसरात एनसीबीच्या पथकाने आंतरराज्य अंमली पदार्थ तस्करी करणाऱ्या रॅकेटचा पर्दाफाश केला आहे. एनसीबीच्या छाप्यात २० किलो मेफेड्रोन जप्त करण्यात आले असून त्याबरोबरच १८६.६ ग्रॅम वजनाचे सोन्याचे दागिने आणि १ कोटी १० लाख २४ हजार रुपयांची रोकड जप्त करण्यात आली आहे.या प्रकरणी एन. खान, ए. अली आणि ए. एफ. शेख नावाच्या महिलेला अटक करण्यात आली आहे.

डोंगरी परिसरात आंतरराज्य अंमली पदार्थांची तस्करी करणारे एक रॅकेट सक्रीय असल्याची माहिती एनसीबीला मिळाली होती. त्याआधारे एनसीबीने सापळा रचला. ए. अली याच्याकडून ३ किलो मेफेड्रोन जप्त करण्यात आले. एन. खानच्या घराची झडती घेतली असता आणखी २ किलो मेफेड्रोन जप्त करण्यात आले. एन. खानने चौकशीदरम्यान एएफ शेख नावाची डोंगरी येथील महिला ड्रग्सचा पुरवठा करत असल्याची माहिती समोर आली.

एनसीबीच्या पथकाने संबंधित महिलेच्या घराची झडती घेतली असता१५ किलो मेफेड्रोन सापडले. त्याचबरोबर १ कोटी १० लाख २४ हजार रुपयांची रोकड व सोन्याचे दागिने सापडले. ड्रग्जच्या तस्करीतून इतकी संपत्ती जमवल्याचे आढळून आले. या कारवाईत काही आक्षेपार्ह कागदपत्रेही जप्त करण्यात आली आहेत.