समीर वानखेडेंचा पाय खोलात.. सुशांतसिंह प्रकरणात गुन्हा कबूल करण्यास सांगितलं, ड्रग्ज प्रकरणातील आरोपीचा गौप्यस्फोट

एनसीबीचे माजी विभागीय प्रमुख समीर वानखेडे गेल्या काही दिवसांपासून वादाच्या भोवऱ्यात अडकले आहेत. काही दिवसांपूर्वी केंद्रीय अन्वेषण विभागाने (सीबीआय) समीर वानखेडे यांच्याविरोधात गुन्हा दाखल केला आहे. त्यानंतर त्यांच्या मुंबईतील निवासस्थानासह अन्य ठिकाणी छापेमारी करण्यात आली. आर्यन खान अटकप्रकरणी समीर वानखेडे यांनी २५ कोटींची लाच मागितली, असा आरोप सीबीआयने केला आहे. याप्रकरणी गुन्हा दाखल केला असून समीर वानखेडे यांची याबाबत उद्या (१८ मे) दिल्लीत सीबीआय मुख्यालयात चौकशी होणार आहे.

सुशांतसिंह राजपूत प्रकरणात आरोप करताना करण सजनानी म्हणाले की, एनसीबीचे अधिकारी आशिष रंजन आणि समीर वानखेडे यांनी म्हटलं होतं की, तुमच्यावर २०० किलो ड्रग्ज प्रकरणात कारवाई करत आहोत. पण दोन आठवड्यानंतर तुम्हाला पुन्हा यावं लागेल आणि सुशांतसिंह प्रकरणात आरोपी बनावं लागेल.

समीर वानखेडे यांना सुशांतसिंह राजपूत मृत्यूप्रकरणी कट रचण्यासाठी ३० हून अधिक लोकांची गरज होती. त्यामुळे त्यांनी मला म्हटलं की, तुम्ही आम्हाला मदत करा. याच्या बदल्यात आम्ही तुम्हाला लवकरात लवकर तुरुंगातून बाहेर काढू, मात्र मी सुशांतसिंहला ओळखतही नव्हतो. समीर वानखेडे असं का करत होते? ते मला माहीत नव्हतं असं सजनानी म्हणाले आहेत.