मुलीला भेटायला मुंबईला निघालेल्या जळगावच्या वृद्ध व्यक्तीस ट्रेनमध्ये शिवीगाळ व मारहाण, गोमांस बाळगल्याचा संशय
Nashik News : जळगाव जिल्ह्यातील रहिवासी हाजी अशरफ हे मुन्यार कल्याण येथील आपल्या मुलीच्या घरी जात होते. दरम्यान, इगतपुरीजवळ गोमांस बाळगल्याच्या संशयावरून सहप्रवाशांनी त्यांना बेदम मारहाण केली.
एक्स्प्रेस ट्रेनमधून गोमांस तस्करी करत असल्याच्या संशयावरून एका वृद्ध व्यक्तीला बेदम मारहाण करण्यात आल्याची घटना घडली आहे. नाशिक जिल्ह्यातील इगतपुरीजवळ ही घटना घडली. रेल्वे पोलिसांनी (जीआरपी) शनिवारी ही माहिती दिली. या आठवड्याच्या सुरुवातीला घडलेल्या या घटनेचा व्हिडिओ सोशल मीडियावर व्हायरल झाला आहे. जीआरपीने याबाबत चौकशी सुरू केली आहे. या व्हिडिओमध्ये डझनभर लोक ट्रेनमध्ये एका व्यक्तीवर हल्ला करताना आणि शिवीगाळ करताना दिसत आहेत.
जीआरपीने दिलेल्या माहितीनुसार, जळगाव जिल्ह्यातील रहिवासी हाजी अशरफ हे मुन्यार कल्याण येथील आपल्या मुलीच्या घरी जात होते. दरम्यान, इगतपुरीजवळ गोमांस बाळगल्याच्या संशयावरून सहप्रवाशांनी त्यांना बेदम मारहाण केली. एका अधिकाऱ्याने सांगितले की, आम्ही व्हिडिओची दखल घेतली आहे आणि पीडिताची ओळख पटवली आहे. या हल्ल्यात सहभागी असलेल्या काही जणांची ओळख पटली असून तपास सुरू आहे. अद्याप कोणताही गुन्हा दाखल करण्यात आलेला नाही.
या घटनेचा व्हिडीओ सध्या सोशल मीडियावर व्हायरल होत आहे. या व्हिडीओमध्ये दिसते की, चालत्या रेल्वेमध्ये काही लोक एका वृद्धाला शिवीगाळ आणि मारहाण करताना दिसत आहेत. त्या व्यक्तीच्या जवळ काही डब्बे देखील दिसत आहेत. यावेळी मारहाण करणाऱ्यांकडून श्रावण महिन्याचा उल्लेख करत मारहाण केली जात आहे. व्हिडिओ समोर आल्यानंतर संताप व्यक्त केला जात आहे.
एमआयएमचे माजी खासदार इम्तियाज जलील यांनी या घटनेवर तीव्र आक्षेप घेतला आहे. आता गरज आहे ती उभी राहून या शक्तींशी लढण्याची. अशा घटना सामान्य बनत चालल्या आहेत. त्यामुळे आपण केवळ मूकदर्शक बनू शकत नाही. सर्व धर्मनिरपेक्ष भारतीयांना अशा शक्तींना पराभूत करण्याची वेळ आली आहे. त्यासाठी आपण एकत्र यायला हवे. जलील म्हणाले की, 'या लोकांमध्ये किती विष पसरलेले आहे ते तुम्ही पाहा. ते कुणासोबत असं करण्याचा विचारही कसा करू शकतात. या घटनेचे बळी बहुधा आजोबांच्या वयाचे आहेत. अशा घटनांबाबत निवेदन देणे आणि सोशल मीडियावर संताप व्यक्त करणे पुरेसे ठरेल, असे ते म्हणाले. सरकार आणि पोलिसांनी डोळेझाक केल्यास समाज म्हणून आपल्याला उभे राहावे लागेल. आपल्याला या शक्तींशी लढण्याची गरज आहे.
गोमांस खाल्ल्याच्या संशयातून गोरक्षकांकडून परप्रांतीय मजुराची हत्या -
हरियाणा (Haryana) मधील चरखी दादरी येथे गोरक्षकांच्या जमावाने गोमांस खाल्ल्याच्या संशयातून (Suspicion of Eating Beef) एका परप्रांतीय मजुराची बेदम मारहाण करत हत्या (Mob Lynching) केली. या घटनेचा व्हिडिओ समोर आला असून यामध्ये जमाव दोन तरुणांना मारहाण करत असल्याचे दिसते. साबिर मलिक असे मृत व्यक्तीचे नाव आहे. एका वरिष्ठ पोलिस अधिकाऱ्याने दिलेल्या माहितीनुसार, गोमांस खाल्ल्याच्या संशयावरून आरोपींनी २७ ऑगस्ट रोजी साबिर मलिक यांची हत्या केली होती.