World Environment Day 2023: जागरूक ठाणेकरांची 'माझा तलाव' मोहीम!

ठाणे महानगरातील ४२ तलाव हे विविध शाळा वा महाविद्यालयांना दत्तक दिल्यास त्या शाळा / महाविद्यालयाने नेमलेला शिक्षक / प्राध्यापक, त्यामधील सर्व वर्गातील स्वयंसेवक (३०/३५ विद्यार्थ्यांचा चमू) आणि पर्यावरण दक्षता मंडळाचे तज्ज्ञ मार्गदर्शक या तलावाच्या संवधर्नावर सतत लक्ष ठेऊ शकतात. या समितीमधील विद्यार्थी त्या परिसरातील असल्यामुळे नेहमी तलावाला भेट देऊन आपली निरीक्षणे नोंदवू शकतात. ही सर्व निरीक्षणे योग्य त्या अधिकाऱ्यापर्यंत पोहोचविण्याचे काम पर्यावरण दक्षता मंडळ करेल.

महानगरपालिकेने आता काही संस्थांना त्या तलावाचे संवर्धन तसेच मासेमारी / बोटिंग असे काही परवाने दिले आहेत. या सर्व संस्था त्यांच्या जबाबदारीचे कशाप्रकारे वहन करतात याचे तसेच या तलावांना भेट देणाऱ्या नागरिकांचे प्रबोधन करून ते तलाव कशाप्रकारे स्वच्छ व पर्यावरणसहयोगी ठेवतात याचे निरीक्षण केले जाईल. तज्ज्ञ व्यक्तींच्या साहाय्याने येथील नियमित भेट देणाऱ्यांचे भेटवृत्त / निरीक्षणे संकलित करून त्याचा अहवाल प्रकाशित केला जाईल.

अशा प्रकारे स्थानिकांच्या विशेषतः शालेय व महाविद्यालयीन विद्यार्थ्यांच्या मदतीने हे काम केल्यास 'माझा तलाव' ही आपलेपणाची भावना निर्माण होईल आणि त्यातून या तलावांचे निश्चितच संवर्धन होईल.

पर्यावरण दक्षता मंडळ आपल्या २५व्या वर्धापन दिनाच्या निमित्ताने 'जलसाक्षरता' कार्यक्रमांतर्गत 'माझा तलाव' ही योजना पर्यावरण दिनाच्या निमित्ताने म्हणजेच आज ५ जून २०२३ रोजी सुरु करण्यात आली.