Mumbai Local: उरात धडकी भरवणारी घटना..! एकाच ट्रॅकवर समोरासमोर आल्या २ लोकल ट्रेन? रेल्वेने केला खुलासा
मराठी बातम्या  /  महाराष्ट्र  /  Mumbai Local: उरात धडकी भरवणारी घटना..! एकाच ट्रॅकवर समोरासमोर आल्या २ लोकल ट्रेन? रेल्वेने केला खुलासा

Mumbai Local: उरात धडकी भरवणारी घटना..! एकाच ट्रॅकवर समोरासमोर आल्या २ लोकल ट्रेन? रेल्वेने केला खुलासा

Jan 15, 2025 09:21 PM IST

Mumbai local train : दोन लोकल ट्रेन एकाच ट्रॅकवर समोरासमोर आल्याची घटना घडली. दोन्ही लोकल अचानक समोरासमोर आल्याने प्रवाशांच्या उराच धडकी भरली व चलबिचल सुरू झाली.पश्चिम रेल्वेच्या मिरा रोड स्टेशनवर हा प्रकार घडला.

दोन लोकल एकाच ट्रॅकवर
दोन लोकल एकाच ट्रॅकवर

Mumbai local train News : मुंबईकरांची जीवनवाहिनी समजल्या जाणाऱ्या लोकलबाबत दररोज काही ना काही बातम्या येत असतात. मात्र आज सायंकाळच्या सुमारास प्रवाशांचा श्वास रोखणारी घटना समोर आली. दोन लोकल ट्रेन एकाच ट्रॅकवर समोरासमोर आल्याची घटना घडली. दोन्ही लोकल अचानक समोरासमोर आल्याने प्रवाशांच्या उराच धडकी भरली व चलबिचल सुरू झाली. पश्चिम रेल्वेच्या मिरा रोड स्टेशनवर हा प्रकार घडला. मात्र, मोटरमनच्या सतर्कतेमुळे मोठा अनर्थ टळला आहे. या घटनेचा व्हिडिओ आता समोर आला आहे.

मिळालेल्या माहितीनुसार, ऐन गर्दीच्या वेळी मिरा रोड रेल्वे स्थानकावर दोन्ही ट्रेन समोरासमोर येण्याची घटना घडली आहे. संध्याकाळच्या वेळी चाकरमानी कामावरून घरी परतत असल्याने सर्व लोकल गर्दीने खचाखच भरून धावत असतात. त्यामुळे चर्चगेटहून वसई-विरारकडे जाणाऱ्या लोकलला नेहमीप्रमाणे आजही मोठी गर्दी होती. 

मिरा रोड रेल्वे स्थानकावर संध्याकाळी प्लॅटफॉर्म क्रमांक ३ वर अचानक एकाच ट्रॅकवर दोन लोकल आल्याने मोठा गोंधळ उडाला. अचानक एकाच ट्रॅकवर दोन लोकल आल्यामुळे प्रवाशांमध्ये भीती पसरली. दादरकडून वसईच्या दिशेनं जात असलेल्या लोकलच्या ट्रकवरच दुसरी लोकल आली. मात्र मोटरमनच्या सतर्कतेमुळे काही मिटर अंतरावर दोन्ही ट्रेन थांबवण्यात आल्या व प्रवाशांनी सुटकेचा निस्वास सोडला.

सिग्नल बिघाडामुळे घटना -

दोन्ही लोकल ट्रेन समोरासमोर येऊ लागल्याने स्टेशनवर उभे असणाऱ्या प्रवाशांमध्ये एकच भीती पसरली होती. स्टेशनवरील प्रवासी ओरडत होते. दोन्ही लोकल एकाच ट्रकवर आल्याने मिरारोड रेल्वे स्टेशनवरील फलाट क्रमांक ३ वरील वाहतूक सेवा विस्कळीत झाली होती. मात्र, काही वेळाने मिरारोड आणि भाईंदर रेल्वे सेवा सुरळीत झाली. सिग्नल बिघाड झाल्याने ही घटना घडल्याचं सांगितले जात आहे. सायंकाळी साडे पाच वाजण्याच्या सुमारास ही घटना घडली. दोन्ही लोकल ट्रेन १० मिनिटे समोरासमोर उभ्या होत्या. या प्रकारानंतर प्रवासी घाबरून रेल्वे ट्रॅकवर उतरले आणि पायी चालू लागले. काहींनी दुसरी ट्रेन पकडून आपले गंतव्यस्थान गाठले.

रेल्वेने केला घटनेबाबत खुलासा -

दरम्यान या घटनेवर रेल्वेकडून खुलासा करण्यात आला असून रेल्वे प्रशासनाने म्हटले आहे की, सोशल मीडियावर व्हायरल होत असलेला व्हिडिओ लोकांची दिशाभूल करणारा आहे. पश्चिम रेल्वे मार्गावरील मीरा रोड स्टेशनवर एकाच ट्रॅकवर दोन लोकल ट्रेन समोरासमोर आल्याची कोणतीही घटना घडलेली नाही.

आज (बुधवारी) सायंकाळी ५ वाजता  एक लोकल ट्रेन पुरेसे आणि सुरक्षित अंतर राखून त्याच ट्रॅकवर दुसऱ्या लोकलच्या मागे उभी होती. हे रेल्वेच्या ऑपरेशनल नियमांनुसारच होते.

उपनगरीय ट्रेन ऑपरेशन नियमानुसार, जर सिग्नल दिवसा १ मिनिटांपेक्षा जास्त काळ लाल असेल (आणि रात्री २ मिनिटे) तर EMU ट्रेन मर्यादित वेगाने पुढे जाऊ शकते आणि पुढील ट्रेनच्या जवळ येऊ शकते. हे पूर्णपणे सुरक्षित आहे आणि सुरक्षा प्रोटोकॉलनुसार आहे. लोकांना विनंती आहे की त्यांनी अफवा तसेच दहशत पसरवणे थांबवावे.

 

Whats_app_banner

संबंधित बातम्या