Mumbai Suicide: त्यानं मला दोनदा प्रेग्नंट केलं आणि...; प्रियकराच्या छळाला कंटाळून मुंबईतील तरुणीची आत्महत्या

एएनआय वृत्तसंस्थेने मुंबई पोलिसांच्या हवाल्याने दिलेल्या माहितीनुसार, मुंबईतील माहीम परिसरात राहणाऱ्या एका तरुणीने आत्महत्या केली. आत्महत्या करण्यापूर्वी तरुणीने व्हिडिओ बनवत आपल्या प्रियकरावर गंभीर आरोप केले आहेत. तरुणीच्या प्रियकराने तिला दोनवेळा गर्भवती केले. परंतु, नंतर त्याने तिच्याशी लग्न करण्यास नकार दिला. यामुळे तरुणीने राहत्या घरात गळफास लावून आत्महत्या केली. याप्रकरणी पोलिसांनी प्रियकराविरोधात बीएनएस कलम १०८ - आत्महत्येस प्रवृत्त करणे अंतर्गत गुन्हा दाखल केला आहे. आरोपी प्रियकराला पोलिसांनी ताब्यात घेतले असून पुढील तपासाला सुरुवात केली आहे.

मृत तरुणी भाड्याच्या खोलीत राहत होती. तिने आत्महत्या केल्याची माहिती तिच्या घरमालकाने पोलिसांना दिली. या घटनेची माहिती मिळताच पोलिसांनी घटनास्थळी धाव घेऊन पंचनामा केला. गुरुवारी दुपारी ४.१५ मिनिटांनी ही घटना उघडकीस आली. ओवैस शेख असे तरुणीच्या प्रियकराचे नाव असून त्यानेच संबंधित तिने आत्महत्या केल्याची घरमालकाला माहिती दिली. यानंतर घराचा मालक आणि ओवैस शेख यांनी दरवाजा तोडला. त्यावेळी तरुणी छतावरील लोखंडी पाईपला गळफास घेतलेल्या अवस्थेत आढळून आली.

यानंतर ओवैस शेखने एका मित्राच्या मदतीने तिला खाली उतरवून सायन रुग्णालयात नेले. परंतु, तिथे डॉक्टरांनी तिला मृत घोषित केले. मृत मुलीच्या मैत्रिणीने सांगितले की, आरोपी ओवैस शेख हा तिचा शारीरिक आणि मानसिक छळ करत होता आणि तिच्याशी लग्न करण्यास नकार देत होता. यातूनच तरुणीने आत्महत्या केली असावी, असा संशय व्यक्त करण्यात आला. माहीम पोलिसांनी ओवैस अब्दुल रहमान शेखविरुद्ध भारतीय दंड संहितेच्या (आयपीसी) कलम १०८ (आत्महत्येस प्रवृत्त करणे), ११७ (२) आणि ३५२ अंतर्गत गुन्हा दाखल केला आहे. आरोपीला ताब्यात घेण्यात आले असून पोलिसांनी पुढील तपास सुरू आहे.