Mumbai Bellasis Bridge To Be Closed For Traffic From Tomorrow: रेल्वे आणि बृहन्मुंबई महानगरपालिकेने जुने बांधकाम पाडून त्या जागी नवीन पूल बांधण्याचा निर्णय घेतला आहे. त्यानुसार, मुंबई सेंट्रल येथील ब्रिटिशकालीन बेलासिस पूलदेखील पुनर्बांधणीच्या कामासाठी पाडला जाणार आहे. हा पूल सोमवारपासून वाहतुकीसाठी बंद राहणार असून पुनर्बांधणीच्या कामाला किमान अठरा महिन्यांचा कालावधी लागणार आहे. तोपर्यंत वाहतूक वळविण्याचा निर्णय वाहतूक पोलिसांनी घेतला आहे.
“रेल्वेच्या या निर्णयानंतर मुंबई वाहतूक पोलिसांनी सोमवारपासून १३० वर्षे जुन्या बेलासिस पुलाच्या दोन्ही बाजूंवरील वाहतूक बंद करण्याचा निर्णय घेतला आहे. बेलासिस हा रेल्वे रुळांवरून जाणारा रेल्वे ओव्हरब्रिज (आरओबी) आहे. ताडदेव ते नागपाडा आणि मुंबई सेंट्रल स्थानकाला जोडणारा हा पूल महत्त्वाचा दुवा आहे. मुंबई सेंट्रल जंक्शन ते ताडदेव सेंट्रल जंक्शन असे पर्यायी मार्ग सुचवण्यात आले आहेत. पाथे बापूराव मार्गावर ताडदेव सर्कल ते नवजीवन जंक्शन पर्यंत नो पार्किंग असणार आहे”, अशी माहिती वाहतूक पोलिसांनी दिली.
रेल्वे रुळांवर नवीन पूल बांधण्यासाठी अधिकाऱ्यांना सुमारे १८ महिन्यांचा कालावधी लागणार असल्याचे अधिकाऱ्यांनी सांगितले. शहरात वाढत्या वाहतुकीची मागणी पाहता त्याजागी केबल- स्टेड स्टीलचा पूल बांधला जाण्याची शक्यता आहे.
१८९३ मध्ये कार्यान्वित झालेल्या बेलासिस ब्रिजने त्याचे कामाचे आयुष्य ओलांडले आहे आणि पुनर्बांधणीची आवश्यकता आहे. अंधेरीतील गोखले पुलाचा काही भाग २०१८ मध्ये कोसळल्यानंतर शहरातील रस्त्यांवरील पुलांची संरचनात्मक स्थिरता चिंतेचा विषय बनली आहे. हा पूल त्यावेळच्या वाहतुकीच्या अंदाजाच्या आधारे बांधण्यात आला होता आणि आता ते कालबाह्य झाले आहेत. मुंबई सेंट्रल येथील १३० वर्षे जुना पूल तारदेव, भायखळा, नागपाडा, ग्रँट रोड आणि आसपासच्या परिसराला जोडतो. वाहतूक पोलिसांनी दिलेल्या माहितीनुसार, दररोज २५ ते ३० हजार वाहनचालक या पुलाचा वापर करतात.
संबंधित बातम्या