काळ आला होता, पण वेळ आली नव्हती; मुंबई बोट दुर्घटनेतून स्वत:सह दोन भावांना वाचवणाऱ्या तरुणाची कथा

मिळालेल्या माहितीनुसार,श्रावण चौधरी (वय,२७) असे त्या तरुणाचे नाव आहे. तो अहमदाबाद शहरातील वस्त्राल भागातील रहिवाशी असून भंगारचा व्यवसाय करतो. घटनेच्या दिवशी श्रावण आपल्या चुलत भावांसह मुंबई फिरायला आला होता. गेट ऑफ इंडियाजवळ फोटो काढल्यानंतर त्यांनी बोटीतून एलिफंटाला जाण्याचा प्लान केला. मात्र, ते ज्या बोटीतून जात होते, त्या बोटीला अपघात झाला. नौदलाच्या नौकेचे इंजिन ट्रायल सुरू असताना त्यांचे नियंत्रण सुटले आणि अंत्यत वेगाने नीलकमल या प्रवासी बोटला धडकली, ज्यात ११० हून अधिक प्रवासी होते.

ही धडक इतकी भीषण होती की, नीलकमल बोट लगेच समुद्रात बुडायला लागली. त्यावेळी श्रावण आणि त्याचे दोन्ही भाऊ देखील पाण्यात बुडू लागले. तितक्यात श्रावणला एक ड्रम तरंगताना दिसला. त्याने लगेच एका हाताने तो पकडला आणि दुसऱ्या हाताने त्याचे चुलत भाऊ जीतू आणि नथाराम चौधरी यांना धरून ठेवले. जवळपास ३० मिनिटे मदत येऊ पर्यंत ते तरंगत राहिले. अखेरिस तटरक्षक दलाच्या जवानांनी तिघांची सुटका केली. या दुर्घटनेतून बचावलेल्या श्रावणने सांगितले की, तो माझ्या आयुष्यातील सर्वात भयानक अर्धा तास होता. मी मृत्यू जवळून पाहिला आहे. अजूनही समुद्रातील तो भयानक क्षण मी विसरू शकलो नाही.

सर्च अँड रेस्क्यू मोहिमेअंतर्गत बेपत्ता प्रवाशांचा शोध घेण्यासाठी नौदलाचे हेलिकॉप्टर आणि नौदल आणि तटरक्षक दलाच्या बोटी तैनात करण्यात आल्या होत्या. दोन्ही जहाजांवरील ११३ जणांपैकी १५ जणांचा मृत्यू झाला असून ९९ जणांना वाचवण्यात यश आले आहे. नौदलाच्या जहाजावर सहा जण होते, त्यापैकी दोन जण बचावले. तर, तिघांचा मृत्यू झाला, अशी माहिती अधिकाऱ्यांनी दिली. या दुर्घटनेवर महाराष्ट्राचे मुख्यमंत्री देवेंद्र फडणवीस यांनी शोक व्यक्त केला. तसेच मृतांच्या कुटुंबाला प्रत्येकी पाच लाख रुपये आर्थिक मदत देण्याची घोषणा केली.