४० फुटांची लाट अन् ६०० प्रवाशांसह जहाज समुद्रात बुडाले, मुंबईत ७८ वर्षांपूर्वी घडली होती भयंकर घटना

१९४७ साली भारत स्वातंत्र्य होण्याआधी एमएस रामदास नावाचे जहाज समुद्रात बुडाले. ही बोट भाऊच्या धक्क्याकडून रेवस येथे जाण्यासाठी निघाली होती. मात्र, त्याआधीच बोट समुद्रात बुडाली. या दुर्घटनेत ६०० पेक्षा जास्त जणांचा बुडून मृत्यू झाला होता.

Mumbai Boat Accident: पोरानं वडापावचा हट्ट धरला अन् त्रिपाठी कुटुंबावरील मोठं संकट टळलं!

मिळालेल्या माहितीनुसार, १७ जुलै १९४७ साली सकाळी ८ वाजता एमएस रामदास बोट भाऊच्या धक्क्याकडून रेवसच्या दिशेने जात होती. ही बोट बंदरापासून ७.५ किमी अंतरावर गेली असता मुसळधार पावसाला सुरुवात झाली. बोट पुढे जात असताना सोसाट्याचा वारा सुरू झाला. त्यामुळे समुद्रात उंच लाटा उसळल्या आणि बोट उलटली. त्यानंतर हळूहळू बोटीत पाणी भरले. बोटीत पाणी शिरत असल्याचे पाहून प्रवासी घाबरले. प्रवाशांना पोहता येत होते, त्यांनी पटापट समुद्रात उडी घेत जीव वाचवला तर काही जण अडकून पडले. सकाळी ९ वाजताच्या सुमारास पूर्ण जहाजच समुद्रात बुडाले.

जहाज मुंबईहून रेवासला पोहचण्यासाठी दीड तास लागतो. हे जहाज बुडाल्याची माहिती संध्याकाळी पाच वाजेपर्यंत कोणालाच नव्हती. जहाजात असलेल्या एका १० वर्षाच्या मुलाने कसाबसा मुंबईचा किनारा गाठला. त्यानंतर एमएस रामदास जहाज समुद्रात बुडाल्याची माहिती मिळाली. त्यानंतर कंपनीने घटनास्थळी दोन बोटी मदतीसाठी पाठवल्या. मात्र, तोपर्यंत सर्वकाही संपले होते. या घटनेत जवळपास साडे सहाशे लोकांचा मृत्यू झाला. बुडालेल्या रामदास बोटीचे काही अवशेष अपघातानंतर सुमारे दहा वर्षांनी म्हणजे १९५७ मध्ये मुंबईतील बेलॉर्ड पिअरच्या समुद्रकिनार्‍यावर वाहात आले होते.