MSRTC : एसटी बसमधून प्रवास करताना आता सुट्ट्या पैशांची चिंता सोडा, ऑनलाइन पेमेंटने काढता येणार तिकीट

सध्या डिजिटलची सवय झाल्याने अनेक प्रवासी घाईगडबडीत एसटी बसमध्ये चढतात. मात्र सुट्टे पैसे नसल्याने वाहकासोबत वादाचे प्रकार होतात. मात्र आता एसटीच्या तिकिटासाठीही ऑनलाइन पेमेंट देण्याची सोय उपलब्ध करून दिली जाणार आहे.

सध्याचा जमाना युपीआय पेमेंटचा असल्याचे दिसत आहे. प्रत्येक जण डेबिट कार्ड व युपीआयमधून छोटे-मोटे पेमेंट करत असतो. त्यामुळे अनेकांच्या खिशात पैसे नसतात. त्यात सुट्ट्या पैशांची समस्या याहून मोठी. याची जाणीव एसटी तून प्रवास करताना होत असते. आता  एसटी महामंडळानेही ऑनलाइन तिकिटाची सुविधा सुरू केल्याने तिकीटांसाठी सुट्ट्या पैशांच्या वादातून एसटी सुटली आहे. त्याच धर्तीवर एसटीने बसमधून प्रवास करतानाही त्याक्षणीचे तिकीटही ऑनलाइन पेमेंट करून देण्याची सोय उपलब्ध केली आहे. 

राज्य परिवहन महामंडळाने डिजिटल पेमेंटीची सुविधा सुरू केली आहे. पुणे विभागातील १४ आगारांत ही सुविधा सुरू झाली आहे. त्यामुळे प्रवासी आणि वाहकांमध्ये सुट्या पैशांसाठी होणारी कटकट मिटली आहे.