एसटी बसचा प्रवास महागला! भाडेवाढीला महामंडळाची मंजुरी, किती रुपये जास्त मोजावे लागणार? वाचा!

महाराष्ट्र राज्य परिवहन महामंडळाच्या बैठकीत हा निर्णय घेण्यात आला आहे. महाराष्ट्र मोटार वाहन विभागानं प्रसिद्धीस दिलेल्या पत्रकात या संदर्भातील माहिती देण्यात आली आहे.

राज्याच्या  गृह विभागाचे (वाहतूक) अपर मुख्य सचिव आणि एसटी महामंडळाचे अध्यक्ष यांच्या अध्यक्षतेखाली ही बैठक झाली. बैठकीली अतिरिक्त पोलीस महासंचालक (वाहतूक) आणि परिवहन आयुक्तांसह प्रमुख सदस्य उपस्थित होते. या बैठकीत अनेक महत्त्वाचे निर्णय घेण्यात आले. एसटी महामंडळाच्या (MSRTC) बसेसच्या प्रवासी भाड्यात वाढ करण्याच्या प्रस्तावावरील निर्णय सर्वात महत्त्वाचा होता. डिझेल, चेसिस आणि टायरच्या वाढत्या किमती, कर्मचाऱ्यांच्या महागाई भत्त्यावरील खर्चाचा हवाला देत दरवाढीचा निर्णय घेण्यात आला. 

हेही वाचा: रिटर्न तिकिट नसल्याच्या कारणावरून भारतीयांना अमेरिकेत प्रवेश नाकारला; ट्रम्पच्या घोषणेमुळे फटका

यापूर्वी २६ ऑक्टोबर २०२१ रोजी एसटीच्या प्रवासी भाड्यात वाढ करण्यात आली होती. नवी भाडेवाढ हकीम समितीच्या शिफारशींच्या आधारे करण्यात आली आहे. नवीन भाडे दर २४ जानेवारी २०२५ रोजी मध्यरात्रीपासून लागू होतील आणि २५ जानेवारीपासून पूर्णपणे लागू होतील. सुधारित भाडे मानक बसेस, एक्सप्रेस सेवा, स्लीपर बसेस आणि वातानुकूलित बसेससह विविध प्रकारच्या सेवांना लागू होईल.

अशी आहे भाडेवाढ

प्रवाशांना आता अधिक पैसे द्यावे लागतील. उदाहरणार्थ, नियमित बसमधील ६ किमी प्रवासाचे भाडे ८.७० रुपयांवरून १०.०५ रुपयांपर्यंत वाढेल, इतर सेवा प्रकारांसाठी आताच्या भाड्याच्या प्रमाणात वाढ होईल.

काय आहेत इतर निर्णय?

भाडेवाढीव्यतिरिक्त महामंडळाच्या बैठकीत नवीन बस डिझाइनला मंजुरी देण्यात आली. महामंडळानं MSRTC साठी टोमॅटो रेड कलर स्कीमसह पर्यावरणपूरक नवीन BS6 स्टँडर्ड बसेसनाही मान्यता दिली आहे.

MSRTC ला नवीन इलेक्ट्रिक बसेसच्या रंगसंगतीसाठी देखील मान्यता मिळाली आहे. 50 ई-बससाठी पांढऱ्या आणि हिरव्या रंगाला मान्यता देण्यात आली आहे आणि सध्याच्या शिवशाही बसेसच्या अनुषंगानं १०० ई-बससाठी निळ्या रंगाला मान्यता देण्यात आली आहे.

हेही वाचा : ठाण्यात भरधाव वाहनाच्या धडकेत सामाजिक कार्यकर्त्या पुष्पा आगाशे यांचा मृत्यू

राज्य सरकारच्या अखत्यातरीत असलेलं महाराष्ट्र राज्य मार्ग परिवहन महामंडळ हे देशातील सर्वात मोठ्या सार्वजनिक वाहतूक सेवेपैकी एक आहे. एसटी महामंडळाच्या ताफ्यात १५,००० बसेस असून दररोज सुमारे ५५ लाख प्रवाशांची वाहतूक केली जाते.