Mahim : बाळासाहेबांचे झाले नाहीत, ते राज ठाकरेंचे काय होणार? शिंदे पिता-पुत्रावर मनसेच्या राजू पाटील यांचा हल्लाबोल

राजू पाटील यांनी वृत्तवाहिन्यांशी बोलताना मुख्यमंत्री एकनाथ शिंदे व खासदार श्रीकांत शिंदे या पितापुत्रांवर जोरदार हल्ला चढवला आहे. 'मला या बाप-बेट्यांची दानत चांगली माहीत आहे. जे बाळासाहेबांचे झाले नाहीत, ते राज ठाकरेंचे काय होणार, अशी जळजळीत टीका राजू पाटील यांनी केली आहे.

‘मला इथली स्थानिक परिस्थिती चांगली माहिती आहे. गेल्या ५ वर्षात या लोकांनी मला खूप त्रास दिलाय किंवा मी त्यांना क्रॉस केलेलं आहे. तो वचपा काढण्यासाठी, सूडभावनेनं त्यांनी इथं उमेदवार दिला आहे’, असं राजू पाटील म्हणाले.

हेही वाचा: माहीममध्ये भाजप कोणाचा प्रचार करणार? नारायण राणे यांनी बेधडक सांगून टाकलं!

कल्याण ग्रामीणमध्ये तिरंगी लढत

कल्याण ग्रामीण मतदारसंघात यंदा तिरंगी लढत होत आहे. इथं मनसेचे विद्यमान आमदार राजू (प्रमोद) पाटील पुन्हा निवडणुकीच्या रिंगणात आहेत. महाविकास आघाडीनं त्यांच्या विरोधात ठाकरेंच्या शिवसेनेचे सुभाष भोईर यांना उमेदवारी दिली आहे. तर, शिंदे गटानंही इथून राजेश मोरे यांना रिंगणात उतरवलं आहे. त्यामुळं राजू पाटील भडकले आहेत. या तीन प्रमुख उमेदवारांसह एकूण १३ उमेदवार कल्याण ग्रामीणमधून रिंगणात आहेत.

विधानसभा निवडणुकीसाठी येत्या २० नोव्हेंबर रोजी मतदान होणार असून २३ नोव्हेंबरला निकाल जाहीर होणार आहेत. निवडणुकीचे अर्ज मागे घेण्याचा आज शेवटचा दिवस होता. त्यानंतर आता चित्र स्पष्ट होणार असून उद्यापासून प्रचाराचा धुरळा उडणार आहे.

हेही वाचा: अजित पवार गटाचे प्रदेश प्रवक्ते ताराचंद म्हस्के यांचा राजीनामा; निवडणुकीच्या तोंडावर शरद पवार गटात प्रवेश