Palghar Rape: लिफ्ट देण्याच्या बहाण्याने अल्पवयीन मुलीवर बलात्कार, पालघर येथील धक्कादायक घटना

मिळालेल्या माहितीनुसार, पीडित मुलगी पालघरमध्ये एका महाविद्यालयात शिक्षण घेते. पीडिता गुरुवारी संध्याकाळच्या सुमारास घरी जाण्यासाठी बसची वाट पाहत असताना आरोपी तिच्याजवळ आला आणि तिला मोटारसायकलवरून घरी सोडतो असे सांगितले. आरोपी हा ओळखीचा असल्याने पीडिताही त्याच्यासोबत जाण्यास तयार झाली. परंतु, आरोपीने तिला घरी सोडण्याऐवजी परिसरातील एका निर्जनस्थळी नेले आणि तिथे तिच्यासोबत जबरदस्ती करण्याचा प्रयत्न केला. पीडिताने विरोध करताच आरोपीने तिला मारहाण केली आणि जीवे ठार मारण्याची धमकी देत तिच्यावर अत्याचार केले.

संतोष देशमुख खून प्रकरणी देवेंद्र फडणवीस यांची घोषणा; दोषींवर मकोका लावणार, बीडच्या पोलीस अधीक्षकांचीही बदली

घरी परतल्यानंतर पीडिताने तिच्यासोबत घडलेला संपूर्ण प्रकार आपल्या घरच्यांना सांगितला. यानंतर पीडिताच्या घरच्यांनी तिला सोबत घेऊन जवळचे पोलीस ठाणे गाठले आणि आरोपी विरोधात बलात्काराची तक्रार नोंदवली. या घटनेचे गांभीर्य लक्षात घेऊन पोलिसांनी ताबडतोब कारवाईला सुरुवात करून आरोपीला अटक केली. याप्रकरणातील आरोपीविरोधात विविध कलमांतर्गत गुन्हा दाखल करण्यात आला. आरोपीला आज न्यायालयात हजर केले जाणार असल्याची माहिती वाडा पोलीस ठाण्याचे पोलीस निरीक्षक दत्तात्रय किंद्रे यांनी दिली. याप्रकरणी पोलीस अधिक तपास करीत आहेत.

राज्यात गेल्या पाच वर्षात बलात्काराच्या घटनेत वाढ

राज्यात गेल्या पाच वर्षात सर्वाधिक बलात्काराच्या घटना २०२३ मध्ये घडल्या आहेत. दरम्यान, २०१७ मध्ये राज्यात एकूण ४ हजार ३२० बलात्काराच्या घटना घडल्या. तर, २०१८ मध्ये ४ हजार ९७४ बलात्काराच्या घटना नोंदवण्यात आल्या. तर, २०१९- ५ हजार ४१२ घटना, २०२० मध्ये ४ हजार ८४६ घटना, २०२१- ५ हजार ९५४ घटना, २०२२ मध्ये ७ हजार ८४ आणि २०२३ मध्ये ७ हजार ५२१ घटना घडल्या आहेत. नॅशनल क्राईम रेकॉर्ड ब्युरोच्या आकडेवारीनुसार, महाराष्ट्रात दिवसेंदिवस महिला अत्याचाराच्या संख्येत वाढ होत असून राज्यात महिला सुरक्षित नसल्याचे स्पष्ट होत आहे.