Mhada Lottery 2024 : मुंबईकरांसाठी खूशखबर! म्हाडाच्या २२६४ घरांसाठी अर्ज करण्यास मुदतवाढ
Mhada Lotteray 2024 : म्हडाच्याकोकण गृहनिर्माण व क्षेत्रविकास मंडळातर्फे २२६४सदनिकांच्या विक्रीसाठी जाहीर सोडतीकरिता ऑनलाईन अर्ज सादर करण्यासाठी मुदतवाढ दिली आहे. त्यामुळे, कमी किंमतीत मुंबईतील घरांचं स्वप्न पाहणाऱ्यांसाठी ही चांगली संधी आहे.
Mhadalottery2024 Update : मुबईत आपल्या हक्काचं घर घेण्यासाठी प्रयत्न करणाऱ्यांना आणखी एक संधी उपलब्ध झाली आहे. म्हडाच्या कोकण गृहनिर्माण व क्षेत्रविकास मंडळातर्फे २२६४ सदनिकांच्या विक्रीसाठी जाहीर सोडतीकरिता ऑनलाईन अर्ज सादर करण्यासाठी मुदतवाढ दिली आहे. आता अर्जदारांना ६ जानेवारी २०२५ रोजी रात्री ११.५९ पर्यंत अर्ज करता येणार आहेत. ही माहिती मंडळाच्या मुख्य अधिकारी रेवती गायकर यांनी दिली.
म्हाडाच्याकोकण मंडळाच्या २२६४ सदनिकांच्या सोडतीसाठी अर्ज प्रक्रियेला ११ ऑक्टोबर, २०२४ रोजी प्रारंभ करण्यात आला. मंडळाने जाहीर केलेल्या सदनिका विक्री सोडतीसाठी अर्जदार ६ जानेवारी २०२५ रोजी रात्री ११.५९ वाजेपर्यंत अर्ज करू शकतात. त्यानंतर अर्जाची लिंक निष्क्रिय करण्यात येणार आहे. ७ जानेवारी २०२५ रात्री ११.५९ पर्यंत अर्जदार अनामत रकमेचा भरणा ऑनलाईन करू शकतील, तसेच ७ जानेवारी, २०२५ रोजी संबंधित बँकेच्या कार्यालयीन वेळेपर्यंत RTGS/NEFT द्वारे अनामत रकमेचा भरणा अर्जदारांना करता येईल.
सोडतीसाठी पात्र अर्जांची प्रारूप यादी २० जानेवारी, २०२५ रोजी सायंकाळी ६ वाजता म्हाडाच्या अधिकृत वेबसाईटवर प्रसिद्ध केली जाईल. त्यानंतर अर्जदारांना प्रारूप यादीवर आपल्या दावे व हरकती २२ जानेवारी, २०२५ रोजी सायंकाळी ५ वाजेपर्यंत नोंदविता येणार आहेत. २४ जानेवारी २०२५ रोजी सायंकाळी ६ वाजता सोडतीत सहभाग घेणार्या अर्जांची अंतिम यादी म्हाडाच्या वेबसाईटवर प्रसिद्ध केली जाणार आहे.
म्हाडाच्या २२६४ घरांसाठी ३१ जानेवारी, २०२५ रोजी सकाळी १० वाजता पात्र अर्जांची संगणकीय पद्धतीने सोडत काढली जाणार आहे. अर्जदारांना सोडतीचा निकाल तात्काळ मोबाईलवर एसएमएस द्वारे, ई-मेल द्वारे तसेच App वर कळवला जाणार आहे. या सोडतीत २० टक्के सर्वसमावेशक योजनेअंतर्गत ५९४ सदनिका, १५ टक्के एकात्मिक गृहनिर्माण योजनेअंतर्गत ८२५ सदनिका, कोकण मंडळाच्या गृहनिर्माण योजनेअंतर्गत विखुरलेल्या ७२८ सदनिका, रोहा-रायगड व ओरस सिंधुदुर्ग येथे ११७ भूखंड विक्रीसाठी उपलब्ध आहेत.
काही महिन्यांपूर्वी म्हाडानं २०३० घरांसाठी ऑनलाईन पद्धतीने अर्ज मागवले होते. त्यावेळी १ लाख २९ हजार अर्ज आले होते. अर्जदारांच्या तुलनेत घरांची संख्या कमी असल्यानं अनेकांचं घराचं स्वप्न पूर्ण होत नाही.
संबंधित बातम्या