मराठी बातम्या  /  महाराष्ट्र  /  मराठा आरक्षणाच्या सर्वेसाठी चक्क महापालिका इंजिनियर्सना लावले कामाला; घराघरात जाऊन करणार सर्वे

मराठा आरक्षणाच्या सर्वेसाठी चक्क महापालिका इंजिनियर्सना लावले कामाला; घराघरात जाऊन करणार सर्वे

Ashwjeet Rajendra Jagtap HT Marathi
Jan 12, 2024 10:11 AM IST

BMC Engineers Letter To Iqbal Singh Chahal: मुंबई महाननगर पालिकेच्या अभियंत्यांनी पालिका आयुक्त इक्बाल सिंह चहल यांना पत्र लिहिले आहे.

BMC
BMC

Maratha Reservation Survey: मुंबई महानगरपालिकेच्या ८०० हून अधिक कनिष्ठ अभियंते, उपअभियंते आणि सहायक अभियंते यांच्यावर मराठा आरक्षण सर्वेक्षणाची जबाबदारी सोपवण्यात आली. परंतु, महापालिकेतील आधीच १ हजार अभियंता पदे रिक्त आहेत आणि सेवेत असलेल्या अभियंता यांना सर्वेक्षणाच्या कामास जुंपल्यास त्याचा परिणाम अभियांत्रिकी कामांवर होईल, यामुळे त्यांना या कामातून वगळण्यात यावे अशी मागणी करणारे पत्र मुंबई महानगर पालिका अभियंते युनियनने आयुक्तांना लिहिले आहे.

अभियंता व अन्य खात्यांमध्ये एकूण चार हजार पदे आहेत. त्यापैकी एक हजार पदे रिक्त आहेत. गेल्या अनेक वर्षांपासून या पदांवर भरती झाली नाही. मात्र, आधीच कामाचा अतिरिक्त भार असताना सेवेत असलेल्या अभियंत्यांवर मराठा आरक्षण सर्वेक्षणाची जबाबदारी सोपवण्यात आली. तसेच सहायक अभियंता पर्यवेक्षक आणि कनिष्ठ अभियंता यांना प्रत्यक्ष जागेवर जाऊन सर्वेक्षण करण्याच्या सूचना देण्यात आल्या आहेत.

अभियंता युनियनने आयुक्तांना लिहिलेल्या पत्रात असे लिहिले आहे की, "मुंबई महानगरपालिकेतील अभियंत्यांची तांत्रिक कामासाठी नेमणूक केली असता त्यांच्यावर मराठा आरक्षण सर्वेक्षणाची जबाबदारी सोपवण्यात आली. मात्र, याचा परिणाम शहरातील नागरी सेवा सुविधांवर होऊ शकतो. यामुळे त्यांना सर्वेक्षणाच्या कामातून वगळण्यात यावे, अशी विनंती आहे."

कामाचे स्वरूप कसे असेल?

  • सर्वेक्षणाच्या कामासाठी ८०० अभियंत्याची निवड करण्यात आली.
  • प्रत्येक गटात एक सुपरवायझर आणि १५ कर्मचारी असतील.
  • प्रत्येक गट दररोज ५० घरांमध्ये जाऊन सर्वेक्षण करतील.
  • एक गट १५० घरांमध्ये फिरणार आहे.
  • यासाठी कर्मचाऱ्यांना आरक्षणाचा अॅप दिला जाणार आहे, ज्यात १५० प्रश्न असतील.

WhatsApp channel

विभाग