Maharashtra Weather Update : राज्यात शुक्रवारी आणि शनिवारी मुसळधार पाऊस झाला. या पावसामुळे विदर्भातील नागपुरात पुरस्थिती निर्माण झाली. दरम्यान, आज देखील कोकण, विदर्भ, मध्य महाराष्ट्रात काही जिल्ह्यात जोरदार पावसाची शक्यता वर्तवण्यात आली आहे. हवामान विभागाने दिलेल्या माहितीनुसार कोकणातील रायगड, रत्नागिरी तर मध्य महाराष्ट्रातील सातारा, कोल्हापूर तर विदर्भातील अकोला, अमरावती, नागपूर, वर्धा, यवतमाळ जिल्ह्यांत जोरदार ते अतिजोरदार पावसाची शक्यता आहे. तर मुंबई, पालघर, ठाणे, पुणे, धुळे, जळगाव, कोल्हापूर आणि विदर्भातील उर्वरित जिल्ह्यात जोरदार पाऊस पडण्याची शक्यता वर्तवण्यात आली आहे.
हवमान विभागाच्या पुणे वेध शाळेने दिलेल्या माहितीनुसार, ओडीसा ते उत्तर आंध्र प्रदेश किनारपट्टी लगत असलेले डिप्रेशन आज ओरिसाच्या किनारपट्टीच्या चिनका सरोवराजवळ स्थिरावले आहे. समुद्रसपाटीवरील दक्षिण गुजरात उत्तर केरळ किनारपट्टी लगत असलेला कमी दाबाचा पट्टा स्थिर आहे. आज दिनांक २१ जुलै व उद्या कोकण गोवा व विदर्भात बहुतांश ठिकाणी तर मध्य महाराष्ट्रात बऱ्याच ठिकाणी तर मराठवाड्यात आज बहुतांश तर उद्या बऱ्याच ठिकाणी पाऊस पडण्याची शक्यता आहे.
रायगड, चंद्रपूर, नागपूर, वर्धा व या जिल्ह्यांमध्ये काही भागात अति जोरदार पावसासह तुरळक ठिकाणी अत्यंत जोरदार वादळी पावसाची दाट शक्यता आहे. तर सातारा जिल्ह्याच्या घाट विभागात तुरळक ठिकाणी अत्यंत जोरदार पावसाची शक्यता आहे. त्यामुळे वरील सर्व जिल्ह्यांना ऑरेंज अलर्ट देण्यात आलेला आहे. तर पालघर, ठाणे, मुंबई, रत्नागिरी, सिंधुदुर्ग, नांदेड, गोंदिया, भंडारा, गडचिरोली जिल्ह्यांना यलो अलर्ट देण्यात आला आहे.
पुणे आणि कोल्हापूर जिल्ह्याच्या घाट विभागात तुरळक ठिकाणी अति जोरदार पावसाची शक्यता असल्याने त्या ठिकाणी ऑरेंज अलर्ट देण्यात आलेला आहे. उद्या रायगड रत्नागिरी अकोला अमरावती यवतमाळ वर्धा नागपूर व साताऱ्याच्या घाट विभागात तुरळक ठिकाणी अति जोरदार पाऊस असल्याने या ठिकाणी सुद्धा ऑरेंज अलर्ट देण्यात आलेला आहे. त्यानंतर पुढील दोन दिवस रायगड येथे तर २२ तारखेला रत्नागिरी सिंधुदुर्ग अमरावती येथे तुरळक ठिकाणी अति जोरदार पावसाची शक्यता असल्याने त्या जिल्ह्यांना ऑरेंज अलर्ट देण्यात आलेला आहे.
आज मराठवाड्यातील बहुतांश जिल्ह्यात तर मध्य महाराष्ट्रातील काही जिल्ह्यात व उद्या कोकण मध्य महाराष्ट्र मराठवाडा व विदर्भातील काही जिल्ह्यात तर त्या पुढील तीन दिवस विदर्भातील बहुतांश जिल्ह्यात व कोकणातील बऱ्याच जिल्ह्यात व लगतच्या पुणे, सातारा, कोल्हापूरच्या घाट विभागात तुरळक ठिकाणी जोरदार ते अति जोरदार पावसाची शक्यता असल्याने वरील सर्व ठिकाणी यलो अलर्ट देण्यात आलेला आहे.
पुणे व परिसरात काही ठिकाणी हलक्या सरी पडण्याची शक्यता आहे. तर घाट विभागात आज तुरळक ठिकाणी अत्यंत जोरदार पाऊस पडण्याची शक्यता असल्याने, घाट क्षेत्रासाठी आज ऑरेंज अलर्ट देण्यात आला आहे. तर उद्यापासून पुढील चार दिवस घाट विभागात तुरळक ठिकाणी अति जोरदार पाऊस होण्याची शक्यता असल्याने, घाट विभाग विभागासाठी यलो अलर्ट देण्यात आलेला आहे.
संबंधित बातम्या