MLC Results 2022 Live: भाजपचे ४, शिवसेना-राष्ट्रवादीचे प्रत्येकी २ उमेदवार विजयी

शिवसेनेचे सचिन अहिर, आमशा पाडवी, राष्ट्रवादी काँग्रेसचे रामराजे नाईक निंबाळकर, एकनाथ खडसे विजयी. भाजपचे प्रवीण दरेकर, राम शिंदे, श्रीकांत भारतीय व उमा खापरे विजयी झाले आहेत.

राष्ट्रवादी काँग्रेसनंतर भाजपच्या उमेदवार उमा खापरे यांच्या कोट्यातील एक मतही बाद झालं आहे. मतपत्रिकेतील खाडाखोडीमुळं मत बाद झालं आहे. ही दोन्ही बाद मतं बाजूला ठेवल्यानंतर मतमोजणी सुरू झाली आहे.

तिसऱ्या पसंतीच्या मतावर पेनानं गिरवण्यात आल्यानं भाजपचे आमदार आशिष शेलार यांनी त्यावर आक्षेप घेतला होता. त्यानंतर ते मत बाद करण्यात आलं आहे.

राष्ट्रवादी काँग्रेसचे उमेदवार रामराजे नाईक निंबाळकर यांच्या कोट्यातील एक मत बाद झालं. त्यामुळं महाविकास आघाडी व भाजपमध्ये वाद सुरू झाला आहे. 

विधान परिषद निवडणुकीच्या मतमोजणीला सुरुवात झाली असून छानणीत सर्व मतं वैध ठरली आहेत. थोड्याच वेळात पहिला निकाल हाती येण्याची शक्यता आहे.

विधान परिषद निवडणुकीची मतमोजणी सुरू होताच राष्ट्रवादी काँग्रेसचे नेते एकनाथ खडसे व शिवसेनेचे सचिन अहिर यांच्या समर्थकांनी विधान भवनाबाहेर जल्लोष सुरू केला आहे.

भाजप आमदारांच्या मतदानावर काँग्रेसनं घेतलेल्या आक्षेपांमुळं रखडलेली विधान परिषद निवडणुकीची मतमोजणी अखेर दोन तासांनंतर सुरू झाली आहे. निकालाची उत्कंठा शिगेला पोहोचली आहे.

भाजपचे आमदार लक्ष्मण जगताप व मुक्ता टिळक यांनी गुप्त मतदान पद्धतीचा भंग केल्याचा काँग्रेसचा आक्षेप राज्य निवडणूक आयोगानं फेटाळला आहे. राज्य निवडणूक आयोगानं केंद्रीय निवडणूक आयोगाला आपला निर्णय कळवला आहे. आता केंद्रीय निवडणूक आयोगाच्या निर्णयाची प्रतीक्षा आहे.

राज्यसभा निवडणुकीप्रमाणेच विधान परिषद निवडणुकीची मतमोजणीही लांबणार आहे. काँग्रेसनं भाजपचे आमदार लक्ष्मण जगताप व मुक्ता टिळक यांच्या मतदानावर आक्षेप घेत ते बाद करण्याची मागणी केली आहे. गुप्त मतदान पद्धती असताना या दोघांनीही आपली मतपत्रिका दुसऱ्याच्या हातात दिल्याचा दावा काँग्रेसनं केला आहे. 

विधान परिषदेच्या निवडणुकीचं मतदान पूर्ण झालं असून सर्व २८५ आमदारांनी मतदानाचा हक्क बजावला आहे. अटकेत असलेले अनिल देशमुख, नवाब मलिक यांना मतदान करता आलं नाही. निवडणुकीची मतमोजणी पाच वाजता सुरू होणार आहे.

विधान परिषद निवडणूक व निकालाच्या पार्श्वभूमीवर उपमुख्यमंत्री अजित पवार यांनी आपला देहू दौरा रद्द केला आहे. श्री संत तुकाराम महाराज पालखी सोहळ्यात सहभागी होण्यासाठी ते देहूला जाणार होते.

सत्ताधारी महाविकास आघाडी व विरोधी पक्षाचे नेते गेल्या काही दिवसांपासून ज्यांची मनधरणी करत होते, ते बहुजन विकास आघाडीचे नेते, आमदार हितेंद्र ठाकूर, क्षितीज ठाकूर व राजेश पाटील मतदानासाठी विधान भवनात पोहोचले आहेत. ते कोणाला मतदान करतात याबद्दल प्रचंड उत्सुकता आहे.

संजय राऊत यांनी राज्यसभेच्या निवडणुकीनंतर संजय राऊत यांनी गैरसमजुतीतून वक्तव्य केलं होतं. त्यांनी स्वत:ही ते सांगितलंय. त्यामुळं तो विषय आता संपलेला आहे. आता महाविकास आघाडीच्याच उमेदवारांचा विजय होईल, असं अपक्ष आमदार संजयमामा शिंदे यांनी म्हटलं आहे.

भारतीय जनता पक्षाचे पिंपरी चिंचवडचे आमदार लक्ष्मण जगताप रुग्णवाहिकेतून मतदानासाठी पोहोचले आहेत. गेल्या काही दिवसांपासून ते रुग्णालयात उपचार घेत आहेत. राज्यसभा निवडणुकीच्या मतदानासाठी देखील त्यांनी हजेरी लावली होती.

विधान परिषदेच्या निवडणुकीसाठी मतदान सुरू असून दुपारी १२ वाजेपर्यंत २०३ आमदारांनी मतदानाचा हक्क बजावला आहे. अजूनही काही आमदारांचं मतदान बाकी असून चार वाजेपर्यंत ते पूर्ण होईल, असा अंदाज आहे.

विधान परिषदेच्या निवडणुकीसाठी भारतीय जनता पक्षाचे नेते देवेंद्र फडणवीस यांच्यासह १०४ आमदारांनी मतदान केलं आहे. सुधीर मुनगंटीवार व आजारी असलेले लक्ष्मण जगताप यांचं मतदान बाकी आहे. ते काही वेळातच मतदान करतील, असं पक्षसूत्रांनी सांगितलं.

महाविकास आघाडी सरकारच्या कारभारावरील नाराजी व देवेंद्र फडणवीस यांच्या नेतृत्वावर आमदारांचा असलेला विश्वास या निवडणुकीत दिसेल. मतदान करणारे आमदार तीन ते साडेतीन लाख लोकांचं प्रतिनिधीत्व करतात. लोकांच्या मनात सरकारबद्दल काय आहे हे आमदार मतदानातून दाखवून देतील, असं प्रवीण दरेकर यांनी सांगितलं.

आम्ही सगळी गणितं चांगल्या प्रकारे सोडवलेली आहेत. संध्याकाळी त्याचा निकाल समोर येईल आणि महाविकास आघाडीचे सर्वच्या सर्व उमेदवार निवडून येतील, असा विश्वास काँग्रेसचे विधान परिषदेचे उमेदवार भाई जगताप यांनी व्यक्त केला आहे.

महाविकास आघाडीतील तिन्ही पक्ष हातात हात घालून चालले आहेत. आमच्या सर्वच्या सर्व जागा निवडून येतील. आम्हाला धोका आहे असं कुणी म्हणत असेल तर ते अर्धवट विधान आहे. धोका हा एकतर्फी नसतो, असं संजय राऊत यांनी सांगितलं.

महाविकास आघाडीचे उमेदवार जिंकून येतील, विधान परिषदेचे आमचे ६ उमेदवार जिंकतील असा विश्वास राष्ट्रवादीचे नेते छगन भुजबळ यांनी व्यक्त केला.

राज्यसभेच्या निवडणुकीत उशिरा पोहचलेले राष्ट्रवादीचे तीन आमदार विधान परिषदेच्या मतदानालासुद्धा उशिरा पोहचण्याची शक्यता आहे. अण्णा बनसोडे, दिलीप मोहिते-पाटील आणि आशुतोष काळे हे अजुनही मुंबईत पोहोचलेले नाहीत.

पक्षाने दिलेला आदेश पाळायचा असतो आणि हे आमच्या रक्तात भिनलं असल्याची प्रतिक्रिया भाजप आमदार मुक्ता टिळक यांनी दिली. कर्करोगाशी झुंज देत असलेल्या मुक्ता टिळक यांनी गंभीर आजाराशी लढा देत असतानाही राज्यसभेच्या मतदानाला याआधी उपस्थिती लावली होती. त्यानंतर आत विधान परिषदेच्या मतदानासाठीही त्या मुंबईला रवाना झाल्या आहेत.

कर्करोगाशी झुंज देत असलेल्या भाजपच्या आमदार मुक्ता टिळक या पुण्यातून मुंबईला रवाना झाल्या आहेत. पक्षाने दिलेला आदेश पाळायचा हे आमच्या रक्तात भिनलंय अशी प्रतिक्रिया त्यांनी दिली.#BJP #Maharashtra #MuktaTilak #Vidhanparishadelection #Pune #Mumbai pic.twitter.com/BPXeXgnE0b

— Hindustan Times Marathi (@htmarathi) June 20, 2022

बहुजन विकास आघाडीचे आमदार क्षितीज ठाकूर हे परदेशातून मुंबई दाखल झाले आहेत. बविआची तीन मते मिळवण्यासाठी चारही पक्षांकडून हितेंद्र ठाकूर यांची भेट घेण्यात आली होती. 

भाजप पूर्ण तयार आहे. मतमोजणी सुरू झाली लक्षात येईल की भाजपने किती आत्मविश्वासाने ही निवडणूक लढवली. आम्ही पाचही जागा जिंकू असा विश्वास भाजप प्रदेशाध्यक्ष चंद्रकांत पाटील यांनी म्हटलं.

विधानसभेच्या दहा जागांसाठी ११ उमेदवार रिंगणात आहेत. यापैकी भाजपचे ४, शिवसेना, राष्ट्रवादीचे प्रत्येकी दोन आणि काँग्रेसचा एक उमेदवार सहज निवडून येऊ शकतो. मात्र भाजपचा पाचवा आणि काँग्रेसचा दुसरा उमेदवार निवडणून आणण्यासाठी आवश्यक असलेली मते दोन्ही पक्षांकडे नाहीत. 

राज्यात आज विधान परिषदेच्या १० जागांसाठी निवडणूक पार पडत आहे. मते फुटू नयेत यासाठी राज्यातील भाजप, राष्ट्रवादी, काँग्रेस, शिवसेना या चारही प्रमुख पक्षांनी आपापल्या आमदारांना मुंबईतील विविध हॉटेल्समध्ये ठेवलं आहे.