Supriya Sule: माजी आयपीएस विरोधात सुप्रिया सुळे यांची निवडणूक आयोगाकडे धाव, नेमके प्रकरण काय?

निवडणूक आयोगाला असे लिहिण्यात आले आहे की, 'माजी आयपीएस अधिकारी रवींद्रनाथ पाटील आणि गौरव मेहता यांनी सुप्रिया सुळे आणि नाना पटोले यांच्यावर बिटकॉईनमध्ये गैरव्यवहार केल्याचा आरोप केला. एवढेच नव्हेतर, त्यांनी या आरोपांना बळ देण्यासाठी सुप्रिया सुळेंच्या आवाजाची खोटी ऑडिओ क्लिप तयार करण्याचाही प्रयत्न केला. डिजिटल माध्यमांचा वापर करून एखाद्या व्यक्तीची फसवणूक आणि बदनामी करण्याच्या हेतूने केलेला हा गंभीर गुन्हा आहे. हे आरोप केवळ खोटे नाहीत तर, सुप्रिया सुळे यांची प्रतिमा आणि प्रतिष्ठा मलिन करण्याचा दुर्भावनापूर्ण प्रयत्न आहे.'

महाराष्ट्रात ९.७ कोटी मतदार बजावणार मतदानाचा हक्क; ४१३६ उमेदवार; १ लाख मतदान केंद्र; मदतीसाठी १९५० हेल्पलाइन क्रमांक

पुढे पत्रात असे लिहिण्यात आले आहे की, 'राज्यात उद्या (बुधवारी) विधानसभा निवडणुकीसाठी मतदान होणार आहे. मतदानाच्या एक दिवस आधी असे आरोप केले जात आहेत. यावरून या खोट्या आरोपांमागील हेतू सिद्ध होतो. कायद्यातील संबंधित तरतुदींनुसार त्वरित एफआयआर नोंदवावा आणि अशा व्यक्तींविरुद्ध सखोल चौकशी करावी, अशी आमची मागणी आहे.'

महाराष्ट्र विधानसभा निवडणुकीसाठी २० नोव्हेंबरला मतदान होणार असून २३ नोव्हेंबर रोजी सर्व २८८ जागांसाठी मतमोजणी होणार आहे. राज्यात महाविकास आघाडी (काँग्रेस, ठाकरे गट, शरद पवार गट) आणि महायुती (भाजप, शिंदे गट, अजित पवार गट) यांच्यात मुख्य लढत आहे. २०२९ च्या महाराष्ट्र विधानसभा निवडणुकीत भाजपला १०५, शिवसेनेला ५६ आणि काँग्रेसला ४४ जागा मिळाल्या होत्या. तर, २०१४ मध्ये भाजपला १२२ जागा, शिवसेनेला ६३ आणि काँग्रेसला ४२ जागा मिळाल्या होत्या. नुकत्याच पार पडलेल्या लोकसभा निवडणुकीत महाविकास आघाडीला मोठे यश मिळाले होते. परंतु, विधानसभा निवडणुकीत जनता कोणाच्या बाजुने कौल देणार, हे येत्या काही दिवसांतच स्पष्ट होणार आहे.