राज्यात मुसळधार पाऊस; खडकवासला, कोयना धरणांतून पाण्याचा विसर्ग वाढवला, नागरिकांना सतर्क राहण्याचे आवाहन

पुण्यातील धरणांच्या पाणलोट क्षेत्रात मुसळधार पाऊस झाल्याने पुणे शहराला पाणीपुरवठा करणाऱ्या चारही धरणांतील पाणीसाठ्यात गेल्या ४८ तासांत लक्षणीय वाढ झाली आहे. खडकवासलातून ३५ हजार ३०० क्युसेक इतका विसर्ग सुरु होता, तो आता वाढवून ४० हजार क्युसेक इतका करण्यात आला आहे. उद्या सकाळी पावसाची स्थिती पाहून पुढील निर्णय घेण्यात येईल, असे सांगण्यात आले आहे. याची संपूर्ण माहिती पुणे महापालिकेला सातत्याने देण्यात येत आहे. तर, कोयनेतून सध्या २० हजार क्युसेक इतका विसर्ग सुरु आहे, तो उद्या पहाटे ३ वाजता ३० हजार क्युसेक इतका होईल. सकाळी ९ वाजता तो ४० हजार क्युसेक इतका होण्याची शक्यता आहे. याशिवाय, महाराष्ट्र सरकार सातत्याने कर्नाटक सरकारशी संपर्कात आहे. कर्नाटकचे अतिरिक्त मुख्य सचिव आणि अलमट्टी धरणाचे मुख्य अभियंता यांच्याशी सातत्याने संवाद होतो आहे. ५१७.५ मीटर इतकी पाणीपातळी कायम ठेवण्यास सांगण्यात आले आहे आणि ते कर्नाटक सरकारने मान्य केले आहे.
 

मुंबईतील बोरिवली येथे कनकिया समर्पण टॉवरला आग; एकाचा मृत्यू, तीन जण जखमी

महाराष्ट्रातील अनेक जिल्ह्यांत उद्या शाळा बंद

महाराष्ट्रात सुरू असलेल्या मुसळधार पावसामुळे अनेक जिल्ह्यातील शाळा उद्या (शुक्रवारी, २६ जुलै २०२४) बंद ठेवण्यात आल्या आहेत. ठाणे, नवी मुंबई, कल्याण - डोंबिवली, रत्नागिरी, रायगड, कोल्हापूर, पुणे आणि सातारा येथील शाळा उद्या बंद राहणार आहेत.

मुंबईतील सर्व शाळा आणि महाविद्यालये उद्या सुरूच राहणार

मुंबई महानगरपालिकेने शहरातील सर्व शाळा आणि महाविद्यालये उद्या सुरूच राहणार असल्याची माहिती दिली. मुंबई महानगरातील हवामान आणि पावसाची स्थिती सद्यस्थितीत सामान्य आहे.बृहन्मुंबई महानगरपालिका प्रशासनाच्या अधिकृत माहितीशिवाय पालकांनी शाळा, महाविद्यालयांच्या सुटीसंदर्भातील अन्य कोणत्याही माहिती किंवा अफवांवर विश्वास ठेवू नये, ही नम्र विनंती आहे.मुंबईतील जनजीवन सुरळीत सुरू असून मुंबई महानगरपालिका क्षेत्रातील सर्व शाळा आणि महाविद्यालये उद्या नियमितपणे सुरू राहतील, असे सांगण्यात आले.