Shiv Sena Revolt Live: शेवटच्या क्षणापर्यंत उद्धव ठाकरे यांच्या सोबत - अजित पवार

एकनाथ शिंदे यांच्या बंडामागे खुद्द उद्धव ठाकरे हेच असल्याची चर्चा आहे. याबाबत विचारलं असता अजित पवार म्हणाले, 'मी गेल्या अडीच वर्षांपासून त्यांच्या सोबत काम करतोय. पाठीमागून काही करण्याची त्यांची पद्धत नाही. काही करायचं असेल तर ते स्वत: समोरून सांगतील.'

भारतीय जनता पक्षाचा कुठलाही मोठा नेता अजूनही समोर आलेला नाही. त्यामुळं शिवसेनेतील बंडामागे भाजपचा हात आहे असं आता म्हणता येणार नाही - अजित पवार 

१७० आमदारांच्या पाठिंब्यावर हे सरकार आलं. उद्धव ठाकरे हे सरकारचे प्रमुख होते. ज्या मतदारसंघात जो पक्ष असेल, तिथं त्या पक्षाला डिस्टर्ब करायचं नाही. मात्र, जिथं आमदार एका पक्षाचा आणि नगरपालिका दुसऱ्या पक्षाची होती, तिथं काहीतरी गडबड झाली असू शकते. पण आमदारांना त्रास देण्याचा हेतू नव्हता - अजित पवार 

अडीच वर्षांपूर्वी सरकार आलं तेव्हा ३६ पालकमंत्री नेमले, ते विशिष्ट सूत्रानुसार नेमले. विकास निधी देताना कुठंही काटछाट केली गेली नाही. कधी दुजाभाव केला नाही. सर्वच आमदारांना विकासकामांमध्ये मदत करण्याची भूमिका माझी असते. आमचे काही मित्र पक्ष वेगवेगळी विधानं करत आहेत. त्यांनी आमच्याशी चर्चा केली असती तर बरं झालं असतं - अजित पवार

राज्यातील सध्याच्या परिस्थितीवर राष्ट्रवादी काँग्रेसच्या बैठकीत चर्चा झाली. उद्धव ठाकरे यांना पूर्ण पाठिंबा देऊन हे सरकार कसं टिकेल यासाठी प्रयत्न केला जाईल. मी स्वत: दुपारी मुख्यमंत्र्यांशी बोललोय. शिवसेनेतील प्रश्नांबद्दल त्यांचे नेते सांगतील. काही आमदार परतले आहेत. त्यांनी वेगळी भूमिका मांडलीय. आम्ही परिस्थितीवर लक्ष ठेवून आहोत. - अजित पवार

ईडीची दहशत माजवून महाराष्ट्रात अस्थिरता निर्माण करण्याचं राजकारण आणि हे राजकीय महाभारत भाजपनं घडवलंय. आता त्यांचे नेते लपून बसलेत. पण त्यांचं हे कारस्थान यशस्वी होणारन नाही. महाविकास आघाडी सरकार पाच वर्षे पूर्ण करेल. वेळ पडल्यास शिवसेनेला बाहेरून पाठिंबा देण्यास काँग्रेस तयार - नाना पटोले

एकनाथ शिंदे यांच्या बंडाच्या पार्श्वभूमीवर भाजपनं आपलं संख्याबळ वाढवण्याचे प्रयत्न सुरू केले आहेत. त्यासाठी अपक्षांना भाजपमध्ये अधिकृत प्रवेश दिला जात आहे. अपक्ष आमदार विनोद अग्रवाल यांनी आज देवेंद्र फडणवीस यांच्या उपस्थितीत भाजपमध्ये प्रवेश केला.

नितीन देशमुख पळून वगैरे गेलेले नाहीत. त्यांना चार्टर्ड विमानानं नागपूरमध्ये सोडण्यात आलं होतं, असा दावा एकनाथ शिंदे यांच्या गटानं केला आहे. तसे फोटोही त्यांच्याकडून प्रसिद्ध केले गेले आहेत.

राज्यातील राजकीय पेचप्रसंगाच्या पार्श्वभूमीवर मुंबईचे पोलीस आयुक्त संजय पांडे हे मुख्यमंत्री उद्धव ठाकरे यांच्या भेटीला गेले आहेत. मुंबईतील सुरक्षा व्यवस्थेच्या मुद्द्यावर त्यांच्यात चर्चा होण्याची शक्यता आहे.

महाविकास आघाडी म्हणून आम्ही मुख्यमंत्री उद्धव ठाकरे यांच्या सोबत आहोत. त्यांना बाहेर पडायचं असेल तर तो त्यांचा निर्णय आहे. त्याला आमची हरकत नाही. आम्ही विरोधात बसायला तयार आहोत, असं काँग्रेसचे प्रदेशाध्यक्ष नाना पटोले यांनी म्हटलं आहे.

महाविकास आघाडीतून बाहेर पडायचं आहे तर ठीक आहे. तुम्ही महाराष्ट्रात या. शिवसेना पक्षप्रमुखांना भेटा. शिवसेना महाविकास आघाडीतून बाहेर पडायला तयार आहे. २४ तासांत परत या. तुमच्या भूमिकेचा विचार करू - संजय राऊत

मीडियाची प्रतिमा वाईट झाली आहे. गावखेड्यातही लोक चर्चा करतात. भाजपनं मीडियातल्या प्रमुख लोकांना खरेदी केलं आहे असं लोक म्हणतात. याचाही विचार करा - नितीन देशमुख

मी आमदार असलो तरी माझ्या मागे माझे शिवसैनिक, पदाधिकारी आहेत. मी बंडखोर आमदारांना विनंती करतो. कोणत्याही आमिषाला बळी पडू नका. कार्यकर्त्यांचा, मतदारांचा विचार करा. शिंदे साहेब तुमच्या खांद्यावर बंदूक ठेवून भाजप शिवसेना संपवण्याचा प्रयत्न करतेय. बळी पडू नका - नितीन देशमुख

सुरतमध्ये फाइव्ह स्टार हॉटेल होतं. तिथं साडेतीनशे पोलीस होते. अनेक आयपीएस अधिकारी होते. हे अधिकारी भाजपची गुलामगिरी करत होते. त्यांच्याशी माझा वादही झाला. हॉटेलात गेल्यावर प्रकाश आबिटकर सुद्धा गायब झालेले दिसले. मला आनंद झाला. मी एकनाथ शिंदे साहेबांना सांगितलं मला इथून जायचं आहे. त्यांनी टाळाटाळ केली. पण मी तिथून निघालो, माझ्या मागे शेकडो पोलीस होते. रात्री साडेबारा ते तीन दरम्यान मी चालत होतो. मोबाइल बॅटरी डाउन होती. सावंत, नाईक यांच्याशी संपर्क केला. तिथला लँडमार्क सांगितला. माझं संभाषण गुजरातचे पोलीसही ऐकत होते. तिथं पोलिसांना मला पकडलं आणि सरकारी रुग्णालयात नेलं. मला कुठलाही त्रास नव्हता. मी डॉक्टरांना सांगत होतो मला अजिबात तपासू नका. मात्र पोलीस आणि डॉक्टरांच्या चर्चेतून मला शंका आली. नंतर डॉक्टर म्हणाला मला हार्ट अॅटॅक आला. तेव्हा मला शंका आली की माझा घातपात करण्याचा प्रयत्न आहे. मी तीन तास कोणाला अंगाला हात लावू दिला नाही. नंतर बळजबरी करून माझ्या हातावर इंजेक्शन दिलं. मला कुटुंबाची आठवण झाली. मला अश्रू अनावर झाले होते. भाजप कशा पद्धतीनं कटकारस्थान करतंय हे यातून दिसून आलं - नितीन देशमुख 

गुजरातच्या दिशेनं नेलं जात असताना एकनाथ शिंदे व काही मंत्र्यांची फोनाफोनी सुरू होती. आमच्यासोबतच्या अनेक आमदारांना याची माहिती नव्हती - नितीन देशमुख

बालाजी कल्याणकरांचा फोन मला आला होता. पण तो कट झाला. त्यांच्यासारख्या अनेक आमदारांना जबरदस्तीनं डांबलेलं असावं असं मला वाटतं - कैलास पाटील

विधान परिषदेचं मतदान झाल्यानंतर एकनाथ शिंदे यांच्या बंगल्यावर बोलावण्यात आलं. आम्ही नियमित त्यांना भेटत असतो. तिथं गेल्या सांगितलं गेलं की आपल्याला एका ठिकाणी जायचंय. नंतर ठाण्यातील महापौर बंगल्यावर नेलं गेलं. तिथून दोन गाड्या घेऊन ठाणे, वसई विरारनंतर पुढं गेल्या. नंतर काहीतरी वेगळं घडत असल्याचा संशय आला. आपण चुकीच्या मार्गानं जातोय असं मला वाटलं - कैलास पाटील

एकनाथ शिंदे गटाला सोडून आलेले आमदार नितीन देशमुख व कैलास पाटील यांची पत्रकार परिषद सुरू

आज शिवसेनेचे काही आमदार म्हणतायत, काँग्रेस-राष्ट्रवादीसोबत सरकार नको. खरंतर, राष्ट्रवादीच्या आमदारांचीही काही कामं झाली नसतील. पण राष्ट्रवादीच्या आमदारांनी कधी तक्रार केली नाही. पवार साहेबांनी हे सरकार स्थापन केलंय याची जाणीव आमच्या आमदारांना होती. त्यामुळं त्यांनी कधीच तक्रार केली नाही. त्याबद्दल मी त्यांचे आभार मानतो - जयंत पाटील

शिवसेनेतील अंतर्गत प्रश्नावर अजित पवार काय बोलणार? मी पक्षाची भूमिका मांडतो आहे. तीच भूमिका अजित पवारांची आहे. अजित पवार यांचाही मुख्यमंत्री उद्धव ठाकरे यांना पाठिंबा आहे - जयंत पाटील

एकनाथ शिंदे यांच्या बंडामागे भाजप आहे का हे अद्याप पुढं आलेलं नाही. विमानं, हॉटेलं कुणी पुरवली यात आम्ही जाणार नाही. त्यावर आम्ही बोलणारही नाही. मीडियाच आम्हाला आणि जनतेला ही माहिती देईल - जयंत पाटील

ईडीच्या दबावाला व आमिषाला बळी पडून पक्ष सोडणारे बाळासाहेबांचे भक्त असू शकत नाही. माझ्यावरही ईडीचा दबाव आहे. माझ्या कुटुंबाला त्रास दिला जात आहे. आमच्या आणखी एका नेत्याची चौकशी सुरू आहे. पण आम्ही पक्ष सोडला नाही. शेवटच्या श्वासापर्यंत शिवसेनेत राहू आणि लढू - संजय राऊत

शिवसेनेचे आमदार नितीन देशमुख व कैलास पाटील सुरतमधून परतले आहेत. त्यांनी उद्धव ठाकरे यांच्यावर विश्वास व्यक्त केला आहे. ते आज पत्रकार परिषद घेणार आहेत. आमदारांवर किती दबाव आहे हे लवकरच कळेल - संजय राऊत

ईडीला घाबरून व आमिषाला बळी पडून कोणी आमदार पळाले असतील तर त्यानं काही फरक पडत नाही. आमदार हा काही पक्ष नाही. शिवसेना एकसंध आहे. उद्धव ठाकरे यांच्या नेतृत्वाखाली शिवसेना वाटचाल करत राहील - संजय राऊत

राज्यातील जनतेला संबोधित केल्यानंतर उद्धव ठाकरे आज राज्यातील अधिकारी व सचिवांना ऑनलाइन संबोधित करणार आहेत. उद्धव ठाकरे यांनी मुख्यमंत्रिपद सोडण्याचा निर्णय घेतल्याचं सूत्रांकडून समजतं.

शिवसेनेचे दोन तृतीयांश पेक्षा अधिक आमदार सोबत असल्याचं स्पष्ट झाल्यानंतर एकनाथ शिंदे आज राज्यपालांकडं 'अधिकृत शिवसेना' आमचीच असा दावा करण्याची शक्यता आहे. त्यामुळं आजच राज्य सरकारच्या भवितव्याचा फैसला होण्याची शक्यता आहे. 

एकनाथ शिंदे यांनी बंड केल्यानंतर हळूहळू शिवसेनेचे आमदार त्यांना पाठिंबा देत असून त्यांना पाठिंबा देणाऱ्यांची संख्या ४१ झाली आहे. शिवसेना पक्षप्रमुख उद्धव ठाकरे यांच्या सोबत आता फक्त १४ आमदार उरले आहेत.

राज्यात निर्माण झालेल्या राजकीय पेचानंतर काँग्रेस नेत्या जया ठाकूर यांनी सर्वोच्च न्यायालयात याचिका दाखल केली आहे. राजीनामा दिलेल्या किंवा विधानसभेतून अपात्र आमदारांना निवडणूक लढण्यास पाच वर्षांची बंदी घालण्यात यावी अशी मागणी त्यांनी याचिकेत केली आहे.

शिवसेनेचे आणखी तीन आमदार गुवाहाटीतील हॉटेलमध्ये पोहोचले आहेत. यामुळे एकनाथ शिंदे यांच्यासोबत असलेल्या आमदारांची संख्या वाढली आहे.

Assam | Three more Shiv Sena's rebel MLAs reach Radisson Blu Hotel in Guwahati amid political instability in the ruling Maha Vikas Aghadi government in Maharashtra pic.twitter.com/B8TE3IMQga

— ANI (@ANI) June 23, 2022

शिवसेनेचे आणखी सहा आमदार नॉट रिचेबल झाले आहेत. मुख्यमंत्र्यांनी काल फेसबुकवरून साधलेल्या संवादानंतरही शिवसेनेचे आमदार निघून जात आहेत. आज दोन आमदार सुरतला पोहचले असून ते गुवाहाटीला जाणार आहेत. तसंच नॉट रिचेबल असलेल्यांमध्ये मंत्री दादा भुसे यांच्यासह मंगेश कुडाळकर, सदा सरवणकर, दिलीप लांडे, दीपक केसरकर आणि संजय राठोड यांचा समावेश आहे.