Maharashtra Oath Ceremony: शपथविधी आधी हायव्होल्टेज ड्रामा, गृहमंत्रीपदासाठी एकनाथ शिंदे ठाम? उदय सामंत म्हणाले...

सर्व मंत्र्यांनी बुधवारी सायंकाळी एकनाथ शिंदे यांची भेट घेऊन त्यांची समजूत काढण्याचा प्रयत्न केला. काय करायचे याचा निर्णय एकनाथ शिंदे लवकरच घेतील. एकनाथ शिंदे सरकारमध्ये सहभागी झाले नाहीत तर आम्हीही सरकारमध्ये सहभागी होणार नाही, असा निर्णय सर्व आमदारांनी घेतला आहे, अशी माहिती उदय सामंत यांनी दिली.

उदय सामंत यांच्या या वक्तव्यामुळे महाराष्ट्राच्या नव्या सरकारबाबतचा सस्पेन्स पुन्हा एकदा वाढला आहे. एकनाथ शिंदे यांनी बुधवारी राजभवनात देवेंद्र फडणवीस आणि अजित पवार यांच्यासमवेत माध्यमांशी संवाद साधला. यावेळी त्यांना शपथेबाबत विचारले असता त्यांनी काय घाई आहे, असे सांगितले. मात्र, बुधवारी रात्रीपर्यंत एकनाथ शिंदे यांनी होकार दिल्याची माहिती मिळाली. यानंतर तासभराने उदय सामंत यांनी एकनाथ शिंदे हे शपथ घेणार की नाही, याचा निर्णय लवकरच सांगणार असल्याचे म्हटले.

शिवसेनेचे नेते दीपक केसरकर म्हणाले, एकनाथ शिंदे नसतील तर कोणीच नाही, हे आम्ही स्पष्ट केले आहे. म्हणजेच शिंदे यांनी उपमुख्यमंत्रिपदाची शपथ घेतली नाही तर कोणताही नेता मंत्री होणार नाही. विशेष म्हणजे शपथविधीसाठी देण्यात आलेल्या निमंत्रण पत्रिकेत केवळ देवेंद्र फडणवीस यांच्या शपथेचा उल्लेख आहे. अशा तऱ्हेने एकनाथ शिंदे शपथ घेणार की नाही, या चर्चांना अधिक बळ मिळत आहे.

विधानसभेत महायुतीला घवघवीत यश

महाराष्ट्र विधानसभा निवडणुकीच्या २८८ पैकी २३४ जागांवर महायुतीच्या उमेदवारांनी विजय मिळवला. तर, महाविकास आघाडीला केवळ ५० जागा जिंकता आल्या. महायुतीमध्ये भाजपाला १३२, शिंदे गटाला ५७ जागा, अजित पवार गटला ४१ जागा मिळाल्या आहेत. तर, महाविकास आघाडीत ठाकरे गटाला २०, काँग्रेसला १६ आणि शरद पवार गटाला १० जागेवर विजय मिळवता आला.