Marathi News 16 September 2022 Live: राष्ट्रवादी काँग्रेसची राष्ट्रीय कार्यकारिणी जाहीर

राष्ट्रवादी काँग्रेस पक्षाची राष्ट्रीय कार्यकारिणी जाहीर झाली आहे. पक्षाच्या अध्यक्षपदी शरद पवार कायम असून प्रफुल्ल पटेल हे पक्षाचे राष्ट्रीय उपाध्यक्ष म्हणून काम पाहणार आहेत. खासदार सुनील तटकरे आणि आमदार जीतेंद्र आव्हाड यांची राष्ट्रीय सरचिटणीस पदी वर्णी लागली आहे. तर, नरेंद्र वर्मा यांच्याकडं राष्ट्रीय सरचिटणीस पदाबरोबरच राष्ट्रीय प्रवक्ते व मीडिया इन चार्ज ही जबाबदारी देण्यात आली आहे.

पत्रा चाळ घोटाळ्याच्या प्रकरणात अटक करण्यात आलेले शिवसेनेचे खासदार संजय राऊत यांनी जामिनासाठी विशेष पीएमएलए न्यायालयात अर्ज केला आहे. त्यावर ईडीनं आज आपलं लेखी म्हणणं मांडताना राऊत यांना जामीन देण्यास विरोध दर्शवला आहे.

पंतप्रधान नरेंद्र मोदी यांचा वाढदिवसाच्या निमित्तानं महाराष्ट्र भाजप १७ सप्टेंबर ते २ ऑक्टोबर या कालावधीत सेवा पंधरवडा हा उपक्रम राबवणार आहे, अशी माहिती प्रदेशाध्यक्ष चंद्रशेखर बावनकुळे यांनी शुक्रवारी नागपूर येथे दिली. या कालावधीत स्वच्छता, आरोग्य शिबिरे, रक्तदान शिबिरे, दिव्यांगांना मदत, मोदी सरकारच्या कामाची माहिती देणारी प्रदर्शने, वैचारिक चर्चा असे विविध उपक्रम होणार असून त्यात पक्षाचे सर्व पदाधिकारी, मंत्री, खासदार, आमदार सक्रिय सहभाग नोंदवतील, असं त्यांनी सांगितलं.

मुंबई इंडियन्सनंतर 'पंजाब किंग्ज'नंही संघाचा प्रशिक्षक बदलला आहे. माजी फिरकीपटू अनिल कुंबळेच्या जागी ट्रेवर बेलिस याच्याकडं प्रशिक्षक पदाची सूत्रे सोपवण्यात आली आहेत. कुंबळेच्या नेतृत्वाखाली संघाची कामगिरी चांगली न झाल्याच्या पार्श्वभूमीवर हा निर्णय घेण्यात आला आहे.

मुंबई शेअर बाजाराच्या निर्देशांकात सकाळपासून होत असलेली पडझड सुरूच असून सध्या सेन्सेक्स एक हजारांहून अधिक अंकांनी गडगडला आहे. निफ्टीतही मोठी घसरण झाली आहे. त्यामुळं गुंतवणूकदारांची धाकधूक वाढली आहे.

जीतकर हारनेवाले को खोके सरकार कहते है. एक लाख नोकऱ्या राज्यात येणार होत्या त्या गेल्या कशा? जो प्रोजेक्ट १०० टक्के महाराष्ट्रात येणार होता तो गेला कसा? हेच कुणाला माहिती नाही. या प्रश्नाची उत्तरं यांना देता येत नाही आणि आमच्यावरच आरोप करतायत असं म्हणत आदित्य ठाकरे यांनी राज्य सरकारवर टीका केली.

शिवसेनेचे नेते आदित्य ठाकरे यांची शिवसंवाद यात्रा रत्नागिरीत पोहोचली असून उद्योग मंत्री उदय सामंत यांच्या मतदारसंघात त्यांची जाहीर सभा सुरू आहे. आदित्य ठाकरे यांनी शिवसेनेच्या बंडखोर आमदारांवर जोरदार हल्ला चढवला आहे. 'खोके सरकार' लोकांसाठी काहीही करताना दिसत नाही. आमच्या योजनांचं श्रेय घेण्याचं काम सुरू आहे, असं टीकास्त्र आदित्य ठाकरे यांनी सोडलं. 

मुंबईसह महाराष्ट्राच्या अनेक जिल्ह्यांत अधूनमधून पावसाच्या जोरदार सरी कोसळत आहेत. नवी मुंबईत सध्या जोरदार पाऊस सुरू आहे. तर, मुंबईच्या आकाशात काळ्या ढगांनी गर्दी केली आहे.

गौतम अदानी हे जगातील दुसऱ्या क्रमांकाचे श्रीमंत व्यक्ती ठरले आहेत. जगातील ‘टॉप टेन’ अब्जाधीशांच्या यादीत इलॉन मस्कनंतर आता गौतम अदानी हे एकमेव आहेत. फोर्ब्स रिअल टाइम बिलियनेअर इंडेक्समध्ये गौतम अदानी यांनी बर्नार्ड अर्नॉल्टला मागे टाकलं आहे. 

मुळशी तालुक्यात तालुक्यात सुरू असलेल्या पावसामुळे मुळशी धरणात पाण्याचा येवा वाढला आहे. यामुळे आज सकाळी धारच्या मुख्य सांडव्यातून सुरू असेलेला विसर्ग ५ हजार ६५८ वरून १३ हजार २०० क्युसेक्स पाणी सोडण्यात येत आहे. यात आवश्यकतेनुसार बदल होण्याची शक्यता आहे. सर्वांना याद्वारे विनंती करण्यात येते की, कृपया नदीपात्रात उतरू नये. आणि नदीपात्रात काही तत्सम साहित्य अथवा जनावरे असल्यास तात्काळ हलविण्यात यावीत. कृपया सखल भागातील संबंधीत नागरीकांना सूचना देण्यात याव्या आणि उचित कार्यवाही करण्यात याव, असे आवाहन बसवराज मुन्नोळी यांनी केले आहे.

यना धरणाच्या पाणलोट क्षेत्रातून पर्जन्य आवक वाढल्याने आज शुक्रवारी सकाळी १० वाजता धरणातून नदीपात्रात एकूण ४१ हजार ९५८ क्युसेक्स विसर्ग सुरू राहणार आहे. त्यामुळे कोयना नदीपात्राजवळील गावांना सतर्कतेचा इशारा देण्यात येत आहे.

पुण्यात कल रात्री पासून जोरदार पासून सुरू आहे. पावसामुळे धरणे भरली आहेत. खडकवासला, पानशेत, वरसगाव व टेमघर धरणे पूर्ण क्षमतेने भरलेली असून धरण क्षेत्रामध्ये पडणाऱ्या पावसाच्या प्रमाणात व येव्यात वाढ होत आहे. येत्या ३ ते ४ तासांमध्ये खडकवासला धरणामधून मुठा नदीपात्रामध्ये अंदाजे २२,००० ते २५,००० क्युसेक विसर्ग सोडला जाण्याची दाट शक्यता आहे. नागरिकांनी नदीपात्रात उतरू नये. आणि नदीपात्रात काही तत्सम साहित्य अथवा जनावरे असल्यास तात्काळ हलविण्यात यावीत. सर्वांनी योग्य ती खबरदारी व दक्षता घ्यावी, असे आवाहन करण्यात आले आहे.

मुंबई शेअर बाजारात गेल्या काही दिवसांपासून बरीच अस्थिरता दिसत आहे. सेन्सेक्सचा सापशिडीचा खेळ सुरू आहे. काल (गुरुवार) सकाळी उसळलेला सेन्सेक्स बाजार बंद होता होता ४०० अंकांनी कोसळला होता. तीच स्थिती आज कायम असून आज सेन्सेक्स ३०० हून अधिक अंकांनी गडगडला आहे. निफ्टीतही घसरण झाली आहे.

उत्तर प्रदेशातील लखनऊमध्ये मुसळधार पावसाने मोठं नुकसान झालं आहे. यात एका ठिकाणी भिंत कोसळून दहा जण ठार झाल्याची माहिती समोर येत आहे.

डॉक्टर बाबासाहेब आंबेडकर मराठवाडा विद्यापीठाच्या प्रांगणात छत्रपती शिवाजी महाराजांच्या अश्वारुढ पुतळ्याचे आज मुख्यमंत्री एकनाथ शिंदेंच्या हस्ते अनावरण होणार आहे.

पंतप्रधान नरेंद्र मोदी शांघाय शिखर परिषदेसाठी उझबेकिस्तानमध्ये पोहोचले आहेत. समरकंद इथं होणाऱ्या दोन दिवसीय SCO शिखर परिषदेत पंतप्रधान मोदी रशियाच्या अध्यक्ष व्लादिमीर पुतिन यांची भेट घेणार आहेत.