Maharashtra Elections : राज्यात दुपारी १ वाजेपर्यंत किती मतदान? सर्वाधिक मतदान कोणत्या जिल्ह्यात?
Maharashtra Elections2024 :यंदाच्या निवडणुकीत नागरिकांमध्ये उत्साही प्रतिसाद पाहायला मिळत असून, विविध जिल्ह्यांमध्ये मतदानाची टक्केवारी वेगवेगळ्या प्रमाणात आहे.
Maharashtra Elections 2024 : महाराष्ट्रात विधानसभा सार्वत्रिक निवडणूक २०२४चं मतदान आज सकाळी ७ वाजेपासून सुरू झालं आहे. दुपारी १ वाजेपर्यंत राज्यभरात सरासरी ३२.१८ टक्के मतदान झाल्याची माहिती निवडणूक आयोगाकडून देण्यात आली आहे. यंदाच्या निवडणुकीत नागरिकांमध्ये उत्साही प्रतिसाद पाहायला मिळत असून, विविध जिल्ह्यांमध्ये मतदानाची टक्केवारी वेगवेगळ्या प्रमाणात आहे.
कोणत्या जिल्ह्यात किती मतदान?
निवडणूक आयोगाकडून देण्यात आलेल्या माहितीनुसार, आज दुपारी १ वाजेपर्यंत अहमदनगर जिल्ह्यात ३२.९० टक्के, अकोला जिल्ह्यात २९.८७ टक्के, अमरावती जिल्ह्यात ३१.३२ टक्के, औरंगाबाद जिल्ह्यात ३३.८९ टक्के मतदान झाले आहे. तसेच, बीडमध्ये ३२.५८ टक्के, भंडारा मध्ये ३५.०६ टक्के, बुलढाणामध्ये ३२.९१ टक्के आणि चंद्रपूर जिल्ह्यात ३५.५४ टक्के मतदान नोंदवले गेले आहे.
‘या’ जिल्ह्यांमध्ये सर्वाधिक मतदान
दुपारी एक वाजेपर्यंत सर्वाधिक मतदान करणाऱ्या जिल्ह्यांमध्ये गडचिरोली ५०.८९ टक्के, गोंदिया ४०.४६ टक्के, कोल्हापूर ३८.५६ टक्के आणि सिंधुदुर्ग ३८.३४ टक्के यांचा समावेश आहे. मुंबईत मात्र मतदानाची टक्केवारी अपेक्षेप्रमाणे कमी आहे. मुंबई शहरात दुपारी एक वाजेपर्यंत २७.७३ टक्के आणि मुंबई उपनगरात ३०.४३ टक्के मतदान झाले आहे.
Maharashtra Election Live updates : राज्यात दुपारी १ वाजेपर्यंत ३२.१८ टक्के मतदान; मतदानासाठी तरुणाईचा उत्साह
पुणे जिल्ह्यात २९.०३ टक्के, नाशिक जिल्ह्यात ३२.३० टक्के, सोलापूरमध्ये २९.४४ टक्के, वर्धा जिल्ह्यात ३४.५५ टक्के, रत्नागिरीमध्ये ३८.५२ टक्के मतदान झालं आहे.
मतदानाला चांगला प्रतिसाद
संपूर्ण राज्यभरात मतदानाची टक्केवारी वेगवेगळी असली तरीही, मतदान करणाऱ्यांची संख्या वयोमानानुसार, लिंगानुसार आणि स्थानिक भागानुसार वेगवेगळी आहे. तर, दिवसाअखेरीपर्यंत मतदानाचं प्रमाण वाढेल असा अंदाज देखील वर्तवण्यात येत आहे.
प्रशासनाच्या माहितीनुसार, मतदानाच्या वेळी काही ठिकाणी रांगा लागलेल्या दिसल्या. तर, सगळीकडेच चांगला प्रतिसाद मिळाल्याचे दिसून आले आहे. त्याचप्रमाणे काही भागांत सुरक्षेच्या दृष्टीने विशेष तयारी देखील करण्यात आलेली आहे. विधानसभा निवडणुकीत मतदान वाढवण्यासाठी लोकांमध्ये जागरूकता निर्माण केली गेली आहे. निवडणुकीची टक्केवारी अधिक होण्याची अपेक्षा व्यक्त केली जात आहे.
आज म्हणजेच २० नोव्हेंबर रोजी महाराष्ट्रात २८८ विधानसभा मतदारसंघांसाठी सकाळी ७ वाजल्यापासून मतदानाची प्रक्रिया सुरू झाली आहे. हे मतदान एकाच टप्प्यात पार पडत आहे. राज्यभरातील २८८ जागांसाठी एकूण ४१३६ उमेदवार निवडणुकीच्या रिंगणात आहेत आणि आज त्यांचं भवितव्य मतपेटीत बंद होईल. मतदान प्रक्रिया ६ वाजेपर्यंत चालू राहील. निवडणुकीचे निकाल २३ नोव्हेंबर रोजी जाहीर होणार आहेत, ज्याद्वारे राज्यात महायुती आणि महाविकास आघाडीमध्ये कोण बाजी मारणार हे स्पष्ट होईल.
