राज ठाकरे यांना धक्का! घरच्या मतदारसंघात चिरंजीव अमित यांचा दारुण पराभव, कबड्डीपटू महेश सावंत यांनी डाव उलटवला

२०१९मध्ये आदित्य ठाकरे यांनी निवडणुकीच्या रिंगणात उतरण्याचा निर्णय घेतला होता, वरळी मतदारसंघातून ते जिंकूनही आले होते. महाविकास आघाडीच्या अडीच वर्षांच्या सत्ता काळात त्यांनी मंत्रिपद ही भूषवलं. आता २०२४साठी महाराष्ट्र विधानसभा निवडणुकीत ठाकरे घराण्यातून अमित ठाकरे हे माहीमच्या मतदार संघातून निवडणुकीच्या रिंगणात सत्तेचं राजकारण करण्यासाठी सज्ज झाले होते. मात्र, आदित्य ठाकरे यांच्यासाठी जशी पोषक स्थिती निर्माण केली गेली, तशी अमित ठाकरेंसाठी होताना दिसली नाही. सदा सरवणकर या मातब्बर उमेदवाराने निवडणुकीच्या रिंगणातून माघार घ्यावी, यासाठी प्रयत्नही झाले. परंतु, सदा सरवणकर त्यांच्या मतावर ठाम राहिले.

लाडकी बहीण योजना नसती, तरी देवेंद्र जिंकला असता! आईने सांगितला फडणवीसांचा व्हिक्टरी फॉर्म्युला

मतांची मोठी दरी!

यामुळे सुरुवातीपासूनच ही निवडणूक अमित ठाकरेंसाठी थोडीशी कठीण जाईल, हे निश्चित झाले होते. १६व्या फेरी अखेर माहीममध्ये अमित ठाकरे पिछाडीवर गेल्याचे चित्र दिसत होते. अमित ठाकरे यांना एकूण२९२५२मतं मिळाली होती. तर, महेश सावंत यांना४३७४७आणि सदा सरवणकर यांना४२७६७मत होती. त्यामुळे अमित ठाकरे हे तिसऱ्या क्रमांकावर गेले होते आणि या तिघांमधली मतांची दरी देखील मोठी होती. त्यामुळे अमित ठाकरे पिछाडीवर पडले असून, त्यांची हार ही निश्चित झाली होती.

महेश सावंत यांची प्रतिक्रिया

‘मी ही निवडणूक सहज जिंकेन. सदा सरवणकर आणि अमित ठाकरे यांचे आव्हान मी मानतच नाही. सदा सरवणकर हे याआधी शिवसैनिकांमुळेच निवडून आले होते. त्यांच्यासाठी आम्ही दिवस-रात्र मेहनत घेतली होती’, अशी प्रतिक्रिया महेश सावंत यांनी दिली होती. दरम्यान, सरवणकर आणि ठाकरे यांच्यातील या लढतीचा लाभ महेश सावंत यांना झाला.