कोल्हापुरात चमत्कार! मृतदेह घरी नेत असताना वाटेत स्पीडब्रेकर लागला आणि तो माणूस जिवंत झाला

पांडुरंग यांच्या नातेवाईकांनी दिलेल्या माहितीनुसार, आम्ही पांडुरंग यांचा मृतदेह रुग्णालयातून घरी घेऊन जात होतो. वाटेत रुग्णवाहिका स्पीडब्रेकरवर आदळली. त्यावेळी आम्हाला पांडुरंग यांच्या बोटांची हालचाल होत असल्याचे दिसून आले. त्यानंतर आम्ही लगेच रुग्णवाहिका दुसऱ्या रुग्णालयात वळवली, जिथे त्यांना दाखल करण्यात आले. पुढचे १५ दिवस त्यांच्यावर उपचार झाले आणि अँजिओप्लास्टी करण्यात आली.

स्पीड ब्रेकरवरील चमत्कारानंतर १५ दिवसांनी सोमवारी पांडुरंग बरे होऊन रुग्णालयातून घरी परतले. तो घरी परतल्याची बातमी संपूर्ण परिसरात चर्चेचा विषय ठरली. पांडुरंग उलपे हे विठ्ठलाचे भक्त म्हणजेच वारकरी आहेत. त्या दिवशीचा प्रसंग सांगताना ते म्हणाले की, 'मॉर्निंग वॉकवरून परतल्यानंतर मी घरी चहा पिऊन बसलो होतो. अचानक मला चक्कर आली आणि श्वास घेण्यास त्रास होऊ लागला. बाथरूममध्ये जाऊन उलट्या झाल्या. मला रुग्णालयामध्ये कोणी नेले ते आठवत नाही. या घटनेमुळे पांडुरंग यांच्या कुटुंबांना नवी उमेद मिळाली आहे. ज्या रुग्णालयात पांडुरंग यांना मृत घोषित करण्यात आले. त्या रुग्णालयाकडून अद्याप कोणतीही प्रतिक्रिया आली नाही.

कोल्हापूर महापालिकेच्या अधिकाऱ्यांनी गुरुवारी टाइम्स ऑफ इंडियाला सांगितले की, या घटनेची चौकशी केली जाईल. केएमसीचे मुख्य आरोग्य अधिकारी प्रकाश पावरा म्हणाले की, ‘डॉक्टर योग्य तपासणीशिवाय एखाद्या व्यक्तीला मृत घोषित करू शकत नाहीत. आम्ही या प्रकरणाची चौकशी करू.’ हृदयरोग तज्ञ डॉ. स्नेहदीप पाटील यांनी ईटीव्ही भारतला सांगितले की, अशा घटना क्वचितच घडतात. ‘त्याची काही कारणे असू शकतात.’ याआधीही अशाप्रकारच्या घटना घडल्या आहेत. कदाचित मृताच्या वैद्यकीय तपासणी करताना डॉक्टरांकडून चुक होऊ शकते.