Ladki Bahin Yojana: डिसेंबरचे पैसे लाडक्या बहि‍णींच्या खात्यात कधी जमा होणार? मुख्यमंत्री एकनाथ शिंदेंनी सांगितली तारीख!

राज्य सरकारच्या मुख्यमंत्री लाडकी बहीण योजनेसाठी पात्र ठरलेल्या महिलांसाठी आनंदाची बातमी आहे. महाराष्ट्र विधानसभा निवडणुकीचा कार्यक्रम जाहीर झाल्यानंतर राज्यात आचारसंहिता लागू झाली. आचारसंहितेमुळे राज्य सरकारने ऑक्टोबर आणि नोव्हेंबर महिन्याचे पैसे आधीच महिलांच्या खात्यामध्ये जमा केले. राज्यात येत्या २० नोव्हेंबरला मतदान होणार आहे. तर, २३ नोव्हेंबरला मतमोजणी होणार आहे. त्यानंतर याच महिन्यात आम्ही लाडक्या बहि‍णींच्या खात्यात डिसेंबरचा हफ्ता जमा करणार असल्याचे मुख्यमंत्री एकनाथ शिंदे यांनी म्हटले. तसेच आम्ही घेणारे नाही तर, देणारे लोक आहोत, अशा शब्दात त्यांनी विरोधकांवर टीकास्त्र सोडले.

लाडक्या बहि‍णींना लखपती करण्याचे आमचे स्वप्न

लाडकी बहीण योजनेवरून सरकारवर टीका करणाऱ्या लोकांचा समाचार घेताना एकनाथ शिंदे म्हणाले की, लाडक्या बहिणी यांना कधीही माफ करणार नाहीत. लाडक्या बहीण योजनेत आडथळा आणणाऱ्यांना लाडक्या बहिणी जोडे दाखवतील. आम्ही सत्तेत आलो तर, लाडक्या बहिणींच्या हफ्त्यात वाढ करू. आम्हाला लाडक्या बहिणींना लखपती करायचे आहे, असे आमचे स्वप्न आहे, असेही एकनाथ शिंदे म्हणाले.

महायुतीच्या उमेदवारांपर्यंत पैसे पोहोचवण्यासाठी पोलीस वाहनांचा वापर, शरद पवारांचा गंभीर आरोप

अजित पवार काय म्हणाले?

पुण्यातील सांगवी येथे बोलताना अजित पवार यांनी लाडकी बहना योजनेवर भाष्य केले. या योजनेसाठी पुढील पाच वर्षांसाठी निधीची तरतूद करण्यात आली. ही योजना सुरूच राहणार आहे. विरोधी पक्ष लाभार्थी महिलांची दिशाभूल करण्याचा प्रयत्न करत आहेत. या योजनेंतर्गत आतापर्यंत २ कोटी ३ लाख महिलांना लाभ मिळाला आहे. ही योजना सुरू ठेवायची असेल तर, महायुतीच्या बाजूने मतदान करा, असे आवाहन अजित पवार यांनी केले आहे. विधानसभा निवडणुकीनंतर अर्थसंकल्प सादर करण्याची संधी मिळाली तर, महाराष्ट्राचा पुढील अर्थसंकल्प ४५ हजार कोटींचा असेल. राज्याचा शेवटचा अर्थसंकल्प ६.५ लाख कोटी रुपयांचा होता.