Maharashtra Elections : कुठं पती-पत्नी तर कुठं काका पुतण्यात सामना; महाराष्ट्रातील ‘या’ जागांवर नातेवाईकच रिंगणात

अजित पवार यांनी बारामती विधानसभा मतदारसंघातून सात वेळा तर बारामती लोकसभा मतदारसंघातून एकदा विजय मिळवला आहे. पवार कुटुंबीयांचा बालेकिल्ला असलेल्या बारामतीत दुसऱ्यांदा या कुटुंबात संघर्ष पाहायला मिळणार आहे. २०२४ च्या लोकसभा निवडणुकीत उपमुख्यमंत्री अजित पवार यांच्या पत्नी सुनेत्रा पवार यांचा बारामती लोकसभा मतदारसंघातून त्यांच्या ननंद आणि राष्ट्रवादी (शरदचंद्र पवार) नेत्या सुप्रिया सुळे यांनी पराभव केला होता.

कन्नड मतदारसंघात पती-पत्नीत सामना -

शेजारच्या कर्जत-जामखेडमध्ये अजित पवार यांचे पुतणे रोहित पवार आणि राष्ट्रवादीचे राम शिंदे यांच्यात लढत होत आहे. रोहित पवार हे शरद पवार यांचे नातू आहेत. छत्रपती संभाजीनगर कन्नड मतदारसंघात अपक्ष उमेदवार हर्षवर्धन जाधव आणि त्यांच्या पत्नी आणि शिवसेनेच्या उमेदवार संजना जाधव यांच्यात लढत होत आहे. संजना या भाजप नेते आणि माजी केंद्रीय मंत्री रावसाहेब दानवे यांच्या कन्या आहेत. संजना जाधव यांचे बंधू संतोष दानवे जालन्यातील भोकरदन मधून भाजपच्या तिकीटावर निवडणूक लढवत आहेत.

वेगवेगळ्या मतदारसंघात भाऊ-भाऊ रिंगणात -

लातूर शहर आणि शेजारच्या लातूर ग्रामीण मतदारसंघातून काँग्रेसचे उमेदवार अमित देशमुख आणि माजी मुख्यमंत्री विलासराव देशमुख यांचे चिरंजीव धीरज देशमुख निवडणूक लढवत आहेत. त्याचप्रमाणे भाजपचे खासदार आणि माजी मुख्यमंत्री नारायण राणे यांचे चिरंजीव नितेश राणे आणि निलेश राणे हे अनुक्रमे शिवसेना आणि भाजपचे उमेदवार म्हणून कुडाळ आणि कणकवलीतून निवडणूक लढवत आहेत.

मुंबईत ठाकरे कुटुंबातील सदस्य वेगवेगळ्या जागांवर निवडणुकीच्या रिंगणात आहेत. शिवसेनेचे विद्यमान आमदार (उद्धव बाळासाहेब ठाकरे) आदित्य ठाकरे वरळीतून पुन्हा निवडणूक लढवत आहेत. त्यांच्या मावशीचा मुलगा वरुण सरदेसाई वांद्रे पूर्व मतदारसंघातून मशाल चिन्हावर निवडणूक लढवत आहे. आदित्य ठाकरे यांचे चुलत बंधू आणि महाराष्ट्र नवनिर्माण सेनेचे अध्यक्ष राज ठाकरे यांचे चिरंजीव अमित ठाकरे मुंबईतील शेजारच्या माहीम मतदारसंघातून निवडणूक लढवत आहेत.

सत्ता आल्यास मुख्यमंत्री कोण होणार? अमित शहा यांनी स्पष्टचं सांगितलं; उद्धव ठाकरे, शरद पवार यांच्यावरही केलं भाष्य

माजी मंत्री गणेश नाईक हे ऐरोली मतदारसंघातून भाजपचे उमेदवार आहेत, तर त्यांचे चिरंजीव संदीप नाईक शेजारच्या बेलापूर मतदारसंघातून राष्ट्रवादीचे उमेदवार आहेत. त्याचप्रमाणे महाराष्ट्राचे मंत्री विजयकुमार गावित आणि त्यांच्या कन्या आणि माजी खासदार हिना गावित हेदेखील निवडणुकीच्या रिंगणात आहेत. मंत्री गावित नंदुरबार मतदारसंघातून भाजपचे उमेदवार म्हणून निवडणूक लढवत आहेत, तर त्यांची मुलगी शेजारच्या अक्कलकुवा विधानसभा मतदारसंघातून अपक्ष उमेदवार म्हणून निवडणूक लढवत आहे.

भाजपचे पीक वाढले आहे, मात्र कीडही लागली आहे, फवारणी करावी लागेल; नितीन गडकरी यांच मोठं विधान

इस्लामपूरमधून राष्ट्रवादीचे प्रदेशाध्यक्ष जयंत पाटील तर राहुरीतून त्यांचे पुतणे आणि माजी मंत्री प्राजक्त तनपुरे हे पक्षाच्या तिकिटावर निवडणूक लढवत आहेत. राष्ट्रवादीचे मंत्री छगन भुजबळ येवला येथून तर त्यांचे पुतणे व माजी खासदार समीर भुजबळ नांदगावमधून अपक्ष उमेदवार म्हणून निवडणूक लढवत आहेत. भाजपचे मुंबई अध्यक्ष आशिष शेलार हे वांद्रे पश्चिम मतदारसंघातून विधानसभा निवडणूक लढवत आहेत. त्यांचे बंधू आणि पक्षाचे उमेदवार विनोद शेलार मालाड पश्चिममधून निवडणूक लढवत आहेत.

नांदेड लोकसभा पोटनिवडणुकीत भाजपचे संतुकराव हुंबर्डे तर त्यांचे बंधू व विद्यमान आमदार मोहनराव हंबर्डे नांदेड दक्षिण विधानसभा मतदारसंघातून काँग्रेसचे उमेदवार म्हणून निवडणूक लढवत आहेत. काँग्रेसचे विद्यमान खासदार वसंतराव चव्हाण यांच्या निधनामुळे नांदेड लोकसभा मतदारसंघात पोटनिवडणूक लागली असून या पोटनिवडणुकीसाठी २० नोव्हेंबरला मतदान होणार आहे.