मुख्यमंत्री एकनाथ शिंदे यांच्यासोबत सुरतमार्गे गुवाहाटीला गेलेले ७ आमदार पराभूत, वाचा कोणा-कोणाला बसला धक्का?
Maharashtra Election Result : एकनाथ शिंदे यांना साथ देणाऱ्या आमदारांसह शिंदे गटाचे आणखी काही नवीन आमदारही निवडून आले आहेत. मात्र त्यावेळी शिंदे यांना साथ देणाऱ्या काही आमदारांना पराभवाचा धक्का बसला आहे.
महाराष्ट्र विधानसभा निवडणुकीच्या निकालांमध्ये राज्यात भाजपप्रणित महायुतीची लाट आल्याचं पाहायला मिळालं. महायुतीने २३५ जागा जिंकून निर्विवाद यश मिळवलं आहे. त्यात एकनाथ शिंदे यांच्या नेतृत्वाखालील शिवसेना शिंदे गटानेही ५७ जागा जिंकत मोठा विजय मिळवला. २०२२ शिवसेनेत बंड झाल्यानंतर ४० आमदारांनी एकनाथ शिंदे यांना साथ देत सुरत मार्गे गुवाहाटी गाठली होती. त्यावेळी एकनाथ शिंदे यांना साथ देणाऱ्या आमदारांसह शिंदे गटाचे आणखी काही नवीन आमदारही निवडून आले आहेत. मात्र त्यावेळी शिंदे यांना साथ देणाऱ्या काही आमदारांना पराभवाचा धक्का बसला आहे.
विधानसभा निवडणुकीत महायुतीतील तिन्ही घटक पक्षांच्या पदरात मतदारांनी भरभरून दान दिले. मुख्यमंत्री एकनाथ शिंदे यांच्या नेतृत्वाखालील शिवसेनेने ५७ जागा जिंकत दमदार विजय़ मिळवत खरी शिवसेना आपलीच हा दावा आणखी मजबूत केला आहे. मात्र शिवसेनेतील फुटीवेळी साथ देणाऱ्य़ा दोन अपक्षांसह पाच आमदारांना पराभवाचा धक्का बसला आहे.
शिवसेनेत फूट पडल्यानंतर एकनाथ शिंदे यांना ४० आमदारांनी साथ दिली होती. मात्र त्यापैकी ५ आमदारांवर पराभवाची नामुष्की ओढवली आहे.
बंडात शिंदेंना साथ देणाऱ्या आमदारांना पराभवाचा धक्का -
- सदा सरवणकर – अमित ठाकरेंच्या उमेदवारीमुळे चर्चेत आलेल्या माहीम विधानसभा मतदारसंघातील ‘हाय होल्टेज’ लढतीमध्ये सदा सरवणकर यांना पराभव पत्कारावा लागला. शिवसेना ठाकरे गटाचे महेश सावंत यांनी त्यांचा १,३१६ मतांनी पराभव केला.
- शहाजीबापू पाटील - सांगोला विधानसभा मतदारसंघात शेकापच्या बाबासाहेब देशमुख यांच्याकडून पाटील य़ांचा २५,३८६ मतांनी पराभव झाला.
- संजय रायमूलकर- मेहकर मतदारसंघात अटीतटीच्या लढतीत शिवसेनेच्या संजय रायमूलकर यांचा शिवसेना (ठाकरे) उमेदवार सिद्धार्थ खरात यांनी ४, ८१९ मतांनी पराभव केल.
- ज्ञानराज चौगुले - उमरगा विधानसभा मतदारसंघामध्ये ज्ञानराज चौगुले यांना शिवसेना ठाकरे गटाच्या प्रवीण स्वामी यांनी ३ हजार ९६५ मतांनी पराभूत केले..
- यामिनी जाधव - शिवसेनेतील बंडावेळी एकनाथ शिंदे यांना साथ देणाऱ्या आमदार यामिनी जाधव यांनाही पराभवाचा धक्का बसला. मुंबईतील भायखळा विधानसभा मतदारसंघामध्ये यामिनी जाधव यांना शिवसेना ठाकरे गटाते मनोज जामसुतकर यांनी ३१ हजार ३३१ मतांनी पराभूत केले.
या अपक्षांचाही पराभव
- बच्चू कडू - एकनाथ शिंदे यांनी शिवसेनेत केलेल्या बंडा वेळी साथ देणाऱ्यांमध्ये अचलपूरचे अपक्ष आमदार बच्चू कडू यांचाही समावेश होता. बच्चू कडू यांनाही या निवडणुकीत पराभवाचा धक्का बसला आहे. भाजपाचे प्रवीण तायडे यांनी बच्चू कडू यांचा १२ हजार १३१ मतांनी पराभव केला.
- गीता जैन - २०१९ च्या निवडणुकीत मीरा भाईंदर विधानसभा मतदारसंघातून अपक्ष निवडून आलेल्या गीता जैन यांचाही यावेळी पराभव झाला आहे. या मतदारसंघात भाजपाचे नरेंद्र मेहता विजयी झाले. तर गीता जैन या तिसऱ्या क्रमांकावर राहिल्या.
