Maharashtra Elections : पुण्यातील शिवाजीनगर मतदारसंघात भाजपच्या दोन गटांत तुफान राडा, कसं आणि काय घडलं?

भाजप उमेदवार सिद्धार्थ शिरोळे यांच्या प्रचारादरम्यान संगमवाडी इथं दोन गट आमनेसामने आले. संगमवाडी गावठाण इथं सिद्धार्थ शोरोळे यांच्या प्रचारार्थ सभेचं आयोजन करण्यात आलं होतं. ही सभा संपल्यानंतर शिरोळे हे संगमवाडी येथील भाजपाचे कार्यकर्त्यांच्या भेटीगाठी घेत होते. त्यावेळी साधारण साडेनऊ वाजण्याच्या सुमारास भाजप कार्यकर्त्यांमध्ये वाद झाला.

हेही वाचा: कदाचित झोपेतून उठले नसतील! सभा रद्द झाल्याचं समजताच सुषमा अंधारे यांची राज ठाकरेंवर खोचक टीका

याची माहिती मिळताच येरवडा पोलीस ठाण्याचे अधिकारी व कर्मचारी संगमवाडी इथं पोहोचले. संबंधित लोकांना पोलीस ठाण्यात तक्रार देण्यासाठी येण्यास सांगितले. मात्र, या कार्यकर्त्यांनी आपसात बैठक होऊन हा वाद आपसात मिटवला आहे. पोलीस ठाण्यात कोणतीही तक्रार दाखल करण्यात आलेली नाही. संगमवाडी गावात सध्या शांतता आहे, अशी माहिती येरवडा पोलीस ठाण्याचे वरिष्ठ पोलीस निरीक्षक शेळके यांनी दिली.

पुण्यातील शिवाजीनगर मतदारसंघ २०१४ पासून भारतीय जनता पक्षाकडं आहे. भाजपचे सिद्धार्थ शिरोळे हे विद्यमान आमदार असून ते पुन्हा निवडणुकीच्या रिंगणात आहेत. २०१९ साली त्यांनी काँग्रेसचे दत्ता बहिरट यांचा पराभव केला होता. या पराभवाचा वचपा काढण्यासाठी बहिरट पुन्हा एकदा उभे ठाकले आहेत. शरद पवार यांची राष्ट्रवादी आता त्यांच्या सोबत आहे. तर, लोकसभा निवडणुकीत या मतदारसंघातून भाजपचे मुरलीधर मोहोळ यांना अपेक्षित मतं मिळाली नव्हती. त्यामुळं यावेळची निवडणूक चुरशीची होणार आहे. 

हेही वाचा : मुंबईत मतदानाच्या दिवशी विशेष लोकल धावणार; येथे पाहा संपूर्ण वेळापत्रक

विधानसभा निवडणुकीसाठी येत्या २० नोव्हेंबरला मतदान होणार आहे. निकाल २३ नोव्हेंबरला जाहीर होणार आहे. राज्यात महाविकास आघाडी आणि महायुती या दोन राजकीय आघाड्यांमध्ये जोरदार चुरस आहे.