नरेंद्र मोदींच्या दौऱ्याला महाविकास आघाडीचा विरोध; संभाजीनगर विमानतळावरून अंबादास दानवेंना घेतलं ताब्यात

बदलापूर घटनेच्या निषेधार्थ छत्रपती संभाजीनगर येथील विमानतळाबाहेर निदर्शने करणाऱ्या विधान परिषदेचे विरोधी पक्षनेते अंबादास दानवे यांना रविवारी ताब्यात घेण्यात आले. पंतप्रधान नरेंद्र मोदी रविवारी शेजारच्या जळगावात एका कार्यक्रमाला उपस्थित राहणार आहेत. पंतप्रधान मोदी विमानतळावर पोहोचून पुढे जळगावला जाणार होते. चिकलठाणा विमानतळाबाहेर पत्रकारांशी बोलताना दानवे म्हणाले, 'पोलिस येथे बळाचा वापर करत आहेत. आमच्यावर बळाचा वापर केला जात आहे, असे आम्ही दहशतवादी आहोत का? बदलापूरच्या घटनेत पोलिसांनी आपल्या अधिकाराचा वापर का केला नाही, बदलापुरात १२ तास गुन्हा दाखल होत नसताना कोणीही काही करत नाही, असे अंबादास दानवे यांनी म्हटले.

Maha Vikas Aghadi: महाविकास आघाडीची एक्सपायरी डेट संपत आली; जागावाटपावरून भाजपची टीका

पंतप्रधानांच्या जळगाव दौऱ्यापूर्वी विमानतळावर कडक सुरक्षा व्यवस्थेत आपण आणि त्यांचे समर्थक आंदोलन का करत आहात, असे विचारले असता दानवे म्हणाले, 'आम्ही त्यांच्या सुरक्षेचीही काळजी घेतो. ते देशाचे प्रमुख असल्याने आम्ही त्यांचा आदर करतो. पोलिसांना त्यांचे काम करू द्या, आम्ही आमचे काम करू.' त्यानंतर पोलिसांनी दानवे आणि इतर आंदोलकांना ताब्यात घेऊन एमआयडीसी सिडको पोलिस ठाण्यात नेले. ठाणे जिल्ह्यातील बदलापूर शहरातील एका शाळेत दोन चिमुकलींवर शिपायाने लैंगिक अत्याचार केल्याच्या घटनेनंतर विरोधकांनी सरकारवर निशाणा साधला आहे. या घटनेतील आरोपीला १७ ऑगस्ट रोजी अटक करण्यात आली.

बदलापूर घटनेच्या निषेधार्थ महाविकास आघडीने २४ ऑगस्ट रोजी महाराष्ट्र बंदची हाक दिली होती. परंतु, उच्च न्यायालयाने कोणत्याही व्यक्ती किंवा राजकीय पक्षाला बंदची हाक देता येणार नाही, असे स्पष्ट करत बंद मागे घेण्याचे आदेश दिले. मात्र, त्यानंतर महाविकास आघाडीने तोंडावर काळी पट्टी बांधून निषेध नोंदवला. राज्यातील कायदा व सुव्यवस्था कार्यक्षम असली पाहिजे, मात्र त्यात हे महायुती सरकार अपयशी ठरले आहे. त्यांनी राज्याच्या गृहमंत्र्यांच्या राजीनाम्याची मागणी केली. तुम्ही एखाद्या कॉन्स्टेबलला, वरिष्ठ पोलीस अधिकाऱ्याला निलंबित करत असाल तर गृहमंत्री आणि पोलिस आयुक्तांचीही काही जबाबदारी आहे, गृहमंत्री राजीनामा कधी देणार, अशी मागणी त्यांनी केली.