Ladki Bahin Yojana : लाडक्या बहिणींसाठी महत्वाची बातमी, सरकारकडून निकषांबाबत पत्रक जारी

लाडकी बहीण योजनेच्या (Ladki Bahin Yojana) निकषांत बदल करण्यात आल्याचं,लाडक्या बहिणींना अपात्र करण्याचं काम सरकारच्यावतीने सुरू असल्याचे मेसेज सोशल मीडियावर फिरत आहेत. त्यामुळे, लाडक्या बहिणींमध्ये संभ्रमाची स्थिती असून आता, याबाबत स्वत: महिला व बाल कल्याण विभागाने स्पष्टीकरण दिलं आहे.

माजी मंत्री व विद्यमान आमदार अदिती तटकरे यांनी सोशल मीडियावर पोस्ट करत स्पष्टीकरण दिले आहे. मुख्यमंत्री माझी लाडकी बहिण योजनेबद्दल रिल्स व व्हिडिओच्या माध्यमातून दिशाभूल करणारी माहिती समाज माध्यमांवर प्रसारित करण्यात येत आहे. मुख्यमंत्री माझी लाडकी बहीण योजना लागू झाल्यापासून आतापर्यंत योजनेच्या निकषांमध्ये कोणताही बदल झालेला नाही, अशी माहिती राज्याच्या महिला व बालविकास विभागाकडून प्रसारित करण्यात आली आहे.एक महिला लोकप्रतिनिधी म्हणून याबाबतीत मी स्वतः जातीने लक्ष ठेवून आहे. तरी, याबाबत समाज माध्यमांतून होणाऱ्या अपप्रचारास कोणीही बळी पडू नये, असे आवाहन तटकरे यांनी केले आहे.

‘मुख्यमंत्री वैद्यकीय सहाय्यता निधी’चे प्रमुख असलेल्या एकनाथ शिंदेंच्या विश्वासू सहकाऱ्याला डच्चू; कोण आहेत नवीन प्रमुख?

डिसेंबरचा हफ्ता कधी जमा होणार -

लाडकी बहीण योजनेबाबत भाजप नेते सुधीर मुनगंटीवार यांनी मोठी माहिती दिली आहे. मुनगंटीवार म्हणाले, की या योजनेबाबत अफवा पसरण्याचं काम सुरू आहे. मुळात या योजनेच्या निकषात कोणतेही बदल झालेले नाहीत. डिसेंबरचे पैसे लवकरच खात्यात जमा होतील. याबाबत मुख्यमंत्री देवेंद्र फडणवीस यांच्यासोबत चर्चा झाली असल्याचंही त्यांनी सांगितलं.

योजनेची रक्कम २१०० होणार -

मुख्यमंत्री माझी लाडकी बहीण’ योजनेचा लाभ राज्यातील जवळपास अडीच कोटी महिलांना मिळत आहे. आतापर्यंत पाच महिन्याचे हफ्ते महिलांच्या बँक खात्यात जमा झाले आहेत. योजनेची रक्कम थेट बँक खात्यात जमा होत आहे. महायुतीने निवडणुकीच्या जाहीरनाम्यात योजनेची रक्कम १५०० रुपयावरून २१०० रुपये करण्याचे आश्वासन दिल्याने आता महिलांच्या खात्यात २१०० रुपये जमा होण्याची शक्यता आहे.