ज्येष्ठ पत्रकार अनंत बागाईतकर यांना ‘पत्रकार दिनू रणदिवे स्मृती पुरस्कार’ जाहीर

समाजातील तळागाळातील लोकांच्या समस्या लेखणीद्वारे मांडणारे ध्येयवादी पत्रकार दिनू रणदिवे यांचे १६ जून २०२० रोजी निधन झाले. संयुक्त महाराष्ट्र चळवळीतील ते एक आघाडीचे शिलेदार होते. रणदिवे यांच्या निधनानंतर घेण्यात आलेल्या श्रद्धांजली सभेत रणदिवे यांच्या अनेकविध कार्याबद्दल कृतज्ञता व्यक्त करण्यासाठी तसेच त्यांना अभिप्रेत अशी पत्रकारिता करणाऱ्या पत्रकाराला दरवर्षी ' पत्रकार दिनू रणदिवे स्मृती पारितोषिक' देण्याचा निर्णय जाहीर करण्यात आला होता. त्यानुसार यंदा हा पुरस्कार जेष्ठ पत्रकार अनंत बागाईतकर यांना जाहीर करण्यात आला आहे. रोख २५००० रुपये आणि सन्मानचिन्ह असे या पुरस्काराचे स्वरुप आहे.

२०२०-२१ या वर्षाचे पहिले 'पत्रकार दिनू रणदिवे स्मृती पारितोषिक' जेष्ठ पत्रकार प्रताप आसबे यांना जाहीर करण्यात आले होते.

डॉ. भालचंद्र मुणगेकर यांच्या अध्यक्षतेखाली स्थापन झालेल्या पुरस्कार निवड समितीमध्ये गुरबीर सिंह, नरेंद्र वाबळे, हारीस शेख व पुष्पा महाडिक यांचा समावेश आहे. पारितोषिक वितरण समारंभ दिनू रणदिवे यांच्या गुरुवारी १६ जून २०२२ या स्मृतिदिनी मुंबईत होईल.