भविष्यात शिंदेंची शिवसेना राहणार नाही असं मी बोललोच नव्हतो; शिंदेंच्या विश्वासू नेत्याचं स्पष्टीकरण

नुकतेच उदय सामंत यांनी केलेल्या ट्विटमध्ये असे म्हटले आहे की, 'एका नामांकीत वृत्तपत्राने अत्यंत खोडसाळपणाची बातमी दिली आहे. अशा प्रकारचे कुठलेही वक्तव्य मी केलेले नाही. मला चौथ्या लोकशाहीच्या स्तंभाचा आदर आहे.परंतु, जे घडल नाही ते दाखवले गेले, हे अत्यंत चुकीचे आहे. अशा पद्धतीने काही संभ्रम निर्माण करणे, ही राजकारणातील वाईट गोष्ट आहे. यावर कायदेशी कारवाई करण्याच्या सूचना देखील देण्यात आल्या आहेत.'

उदय सामंत म्हणाले की,'एक बातमी माझ्या नावाने दाखवली जात आहे. एका नामांकित वृत्तपत्राच्या वेबसाईटवर अशी बातमी आली आहे की, मी असे बोललोय की, एकनाथ शिंदे यांची शिवसेना विलीन होणार आहे. इतक्या वाईट पद्धतीने मी न बोललेले प्रसार माध्यमात दाखवण्यात आले. मला चौथ्या लोकशाहीच्या स्तंभाचा आदर आहे. परंतु, जे घडले नाही, ते दाखवले गेले, हे अत्यंत चुकीचे आहे. अशा पद्धतीने काही संभ्रम निर्माण करणे ही राजकारणातील वाईट गोष्ट आहे. मी सर्व पत्रकार परिषद कॅमेऱ्यांसमोर घेतलेल्या आहेत. माझी काल कुठेतरी पत्रकार परिषद झाली, तिथे मी असे वक्तव्य केले, असे यात सांगण्यात आले. पण हे फार चुकीचे आहे. याप्रकरणी मी कायदेशीर कारवाई करण्याच्या सूचना दिल्या आहेत.'

‘ज्या पद्धतीने एकनाथ शिंदे यांचे बळ महाराष्ट्रात आहे, हे त्यांनी आपल्या कर्तृत्वावर सिद्ध करून दाखवले आहे. त्यांनी घेतलेल्या निर्णयावर सिद्ध करून दाखवले. शिवसेना म्हणून आम्ही त्यांच्या नेतृत्वाखाली काम करत आहोत. ते हिंदुहृदयसम्राट बाळासाहेब ठाकरे यांचा विचारांचा वारसा पुढे घेऊन जात आहेत. त्यामुळे शिवसेना इकडे नेणे, तिकडे नेणे, अशी कुठेही चर्चा झालेली नाही. त्यामुळे या निवडणुकीत जिंकलेले सर्व आमदार एकनाथ शिंदे यांच्या नेतृत्वाखाली पुढील तिन्ही निवडणुका लढतील’, असे उदय सामंत यांनी स्पष्ट केले.