शस्त्रक्रियेनंतर महिलांना थंडी-गारठ्यात जमिनीवर झोपवलं, हिंगोलीतील सरकारी रुग्णालयातील प्रकार!

मिळालेल्या माहितीनुसार, हिंगोलीतील आखाडा बाळापूर ग्रामीण रुग्णालयात काल (१३ डिसेंबर) एकूण ४३ महिलांवर कुटुंब कल्याण शस्त्रक्रिया पार पडली. त्यानंतर रुग्णालयात बेड नसल्याने या महिलांना जमीनीवर झोपवण्यात आले. थंडी गारठ्यात महिलांना जमीनीवर झोपवण्यात आल्याने त्यांच्या नातेवाईकांनी आरोग्य यंत्रणांवर रोष व्यक्त केला. एवढेच नव्हेतर शस्त्रक्रियेनंतर महिलांच्या स्वच्छतेबाबत देखील काळजी घेतली जात नसल्याचे अनेकांनी आरोप केला. याप्रकरणी रुग्णालय आणि संबंधितांवर कारवाई करण्यात यावी, अशा मागणीने जोर धरला आहे.

'परदेशात जातो तेव्हा मला तोंड लपवावं लागतं! वाढत्या रस्ते अपघातांवर नितीन गडकरी यांचा सरकारला घरचा आहेर

हिंगोली रुग्णालय प्रकारावर काँग्रेस नेते विजय वडेट्टीवार यांनी संताप व्यक्त केला.'आरोग्य विभागाचा बट्ट्याबोळ झाला आहे. बोगस औषध, बोगस खरेदी, भ्रष्टाचार सुरू आहे. चोरांचा सुळसुळाट झाला आहे. तुम्ही कितीही पैसे खा, मात्र लोकांच्या मूलभूत गरजा पूर्ण करा, अशा शब्दांत त्यांनी सरकारवर निशाणा साधला. शस्त्रक्रिया झालेल्या महिलांना खाली झोपण्याची वेळ येत असेल तर महाराष्ट्रात सरकार आहे का? असा प्रश्न निर्माण होतो. राज्यात सरकार येऊन ऐवढे दिवस झाले तरी, अजूनही पदांबाबत चर्चा सुरू आहे. तुम्ही आपापसात बसून चर्चा करत नाही, महाराष्ट्रातल्या जनतेला न्याय देत नाही. अधिवेशनात आम्ही या मुद्द्यांवर भर देऊ, असा इशाराही विजय वडेट्टीवार यांनी दिला.

देवेंद्र फडणवीसांकडून या प्रकरणाची दखल घेण्यात आली. फडणवीस यांनी आरोग्य विभागाच्या सचिवांना फोन केला आणि याप्रकरणाची चौकशी करण्याचे निर्देश दिले आहेत.