Photos: पुण्यात धो-धो पाऊस कोसळला; ठिकठिकाणी तुंबलं पाणी; वाहतूक खोळंबल्याने पुणेकरांचे हाल

पुण्यातील नवी पेठेत संध्याकाळ नंतरचे चित्र. पुणे शहरातील विविध पेठा, डेक्कन जिमखाना, कोथरुड, पर्वती भागात शनिवारी संध्याकाळी धो धो पाऊस कोसळला. येथे राज्यातील सगळ्यात जास्त पावसाची नोंद झाली. पुण्यातील रस्त्यांना नद्यांचे रुप आले होते. शिवाजी नगर, अलका टॉकीज चौक, कोथरुड, कात्रज, सिहगड रोड यासोबतच अनेक परिसरात रस्ते तुंबले होते.

पुण्यातील कोथरुडचे चित्र. शनिवारी सायंकाळी पुणे शहरातील शिवाजीनगर आणि पाषाण भागात सर्वाधिक पावसाची नोंद झाली आहे. उपमुख्यमंत्री व पुण्याचे पालकमंत्री अजित पवार यांनी पुणे महानगरपालिकेचे आयुक्त आणि पुणे जिल्हाधिकाऱ्यांशी दूरध्वनी करून माहिती घेतली. प्रशासनाने तातडीनं उपाययोजना करून पावसात अडकलेल्या नागरिकांना मदत करण्याच्या सूचना अजित पवार यांनी दिल्या.

पुण्यात धो धो पाऊस कोसळल्यामुळे शहरात काही भागात झाडे पडल्याच्या घटना घडल्या. येरवडा भागात नागपुरी चाळ येथे झाड पडल्यानंतर अग्निशमन दलाचे जवान लगेच घटनास्थळी पोहचले.

पुण्यात नागरिकांनी शक्यतो घराबाहेर पडू नये, अशा सूचना शहर प्रशासनाने दिल्या आहेत. पुण्यातील नागरिकांनी काळजी घ्यावी. तसेच येत्या पाच दिवसात राज्यात अनेक ठिकाणी मान्सूनपूर्व पाऊस जोरदार हजेरी लावणार असल्याचा इशारा हवामान खात्याने दिला आहे. त्या अनुषंगाने राज्यातील आपत्ती व्यवस्थापन कक्षाला सतर्क राहण्याच्या सूचना देण्यात आल्या आहेत.