Maharashtra Weather Update:राज्यात पावसाचा जोर कायम! कोकण साताऱ्याला रेड, तर मुंबई पुण्यासह 'या' जिल्ह्यांना ऑरेंज अलर्ट
Maharashtra Weather Update : राज्यात पावसाचा जोर आजही कायम राहणार आहे. कोकण, मध्यमहाराष्ट्र विदर्भात आज जोरदार पाऊस पडण्याची शक्यता वर्तवण्यात आली आहे. कोकणात रेड तर मुंबई, पुण्याला ऑरेंज अलर्ट देण्यात आला आहे.
Maharashtra Weather Update : राज्यात गुरुवारी पावसाने तुफान हजेरी लावली. या पावसामुळे राज्यातील बहुतांश भागात पुरस्थिती निर्माण झाली होती. आज शुक्रवारी देखील जोरदार पाऊस पडण्याची शक्यता हवामान विभागाने वर्तवली आहे. आज कोकणातील रत्नागिरी व रायगड जिल्हा तर मध्य महाराष्ट्रातील सातारा जिल्ह्याला पावसाचा रेड अलर्ट जारी करण्यात आला आहे. तर मुंबई, ठाणे,पालघर, पुणे, सिंधुदुर्ग, कोल्हापूर या जिल्ह्यांना पावसाचा ऑरेंज अलर्ट दिला आहे. तर विदर्भात यलो अलर्ट जारी करण्यात आला आहे. आजही जोरदार पाऊस पडण्याची शक्यता असल्याने नागरिकांनी गरज असेल तरच घराबाहेर पडावे असे आवाहन करण्यात आले आहे.
पुणे वेध शाळेने दिलेल्या माहीतीनुसार समुद्रा सपाटीवरील कमी दाबाचा पट्टा दक्षिण गुजरात ते उत्तर केरळच्या किनारपट्टी पर्यंत सक्रिय आहे. यामुळे कोकण गोव्यामध्ये पुढील पाच ते सात दिवस तर मध्य महाराष्ट्र मराठवाडा व विदर्भामध्ये पुढील दोन दिवस बहुतांश ठिकाणी जोरदार पाऊस पडण्याची शक्यता आहे. त्यानंतर पुढील चार ते पाच दिवस मध्य महाराष्ट्र मराठवाडा व विदर्भामध्ये बऱ्याच ठिकाणी पाऊस पडण्याची शक्यता आहे.
आज रायगड रत्नागिरी व साताऱ्याच्या घाट विभागात अत्यंत जोरदार पाऊस पडण्याची शक्यता आहे. त्यामुळे या जिल्ह्यांना रेड अलर्ट दिलेला आहे. रत्नागिरी जिल्हा आणि नाशिक व कोल्हापूर जिल्ह्याच्या घाट विभागात तसेच चंद्रपूर आणि गडचिरोली येथे खूप जोरदार पाऊस पडण्याची शक्यता आहे. त्यामुळे आज या भागांना ऑरेंज अलर्ट देण्यात आला आहे. तर पालघर, ठाणे, मुंबई, सिंधुदुर्ग तसेच पुणे, कोल्हापूर जिल्ह्याच्या घाट विभागात खूप जोरदार पाऊस पडण्याची शक्यता आहे. त्यामुळे या भागांना ऑरेंज अलर्ट देण्यात अल आहे. मुंबई, नाशिक, पुणे, कोल्हापूर व सातारा यांच्या मैदानी भागांमध्ये मध्यम स्वरूपाचा पाऊस पडण्याची शक्यता वर्तवण्यात आली आहे.
सिंधुदुर्ग, जळगाव, अहमदनगर, सांगली, छत्रपती संभाजी नगर, जालना, परभणी, बीड हिंगोली नांदेड या जिल्ह्यांमध्ये आज तुरळक ठिकाणी जोरदार पाऊस पडण्याची शक्यता आहे. तर नागपूर, यवतमाळ येथे तुरळक ठिकाणी मेघगर्जनात व विजांच्या कडकडाटा सहित पाऊस पडण्याची शक्यता आहे. विदर्भामध्ये पुढील चार-पाच दिवस बऱ्याच ठिकाणी हे यलो अलर्ट दिलेला आहे.
पुणे व परिसरात आकाश संपूर्ण ढगाळ राहून जोरदार ते अति जोरदार संततधार पाऊस पडण्याची शक्यता आहे तसेच घाट विभागात तुरळक ठिकाणी खूप जोरदार ते अत्यंत जोरदार पाऊस पडण्याची शक्यता आहे. त्यामुळे पुणे शहर व परिसरात रेड अलर्ट जारी करण्यात आला आहे. उद्या २६ जुलै रोजी आकाश पूर्णत; ढगाळ राहून जोरदार ते खूप जोरदार पाऊस पडण्याची शक्यता आहे. तसेच घाट विभागात तुरळक ठिकाणी खूप जोरदार व अत्यंत जोरदार पाऊस पडण्याची शक्यता आहे. त्यामुळे पुणे शहरात व घाट विभागात रेड अलर्ट दिला आहे. उद्या २७ जुलै रोजी पुणे व परिसरात आकाश सामान्यत: ढगाळ राहून मध्यम व जोरदार स्वरूपाचा पाऊस अधून मधून पडण्याची शक्यता आहे त्यामुळे घाट विभागात ऑरेंज देण्यात आला आहे.
संबंधित बातम्या