Heatwave in Mumbai: मुंबईमध्ये आणखी दोन दिवस निघणार घामाच्या धारा… उष्णतेच्या लाटेत काळजी घ्या

दिवसेंदिवस वाढत चाललेल्या उन्हाच्या झळांमुळे मुंबईकर घामाघुम झाले असून मुंबई आणि ठाणे शहरात येत्या शनिवारपर्यंत उष्णतेची लाट कायम राहणार असल्याचं हवामान खात्याने म्हटलं आहे. मुंबईतील सांताक्रूज वेधशाळेत काल, गुरुवारचे कमाल तापमान ३६.९ अंश तर किमान तापमान २८ अंश नोंदवले गेले. बुधवारी सांताक्रूज वेधशाळेत मुंबईचे तापमान ३३.९ अंश नोंदवले गेले होते. बुधवारच्या तुलनेत काल, गुरुवारी शहराच्या तापमानात २ ते २.५ अंशाहून अधिक वाढ झाली होती. मुंबईत कुलाबा भागात हवेत ७९ टक्के आर्द्रता होती तर सांताक्रूज परिसरात हवेत ७२ टक्के आर्द्रतेची नोंद झाली आहे. कालचे मुंबईचे तापमान गेल्या १० वर्षांमधील मे महिन्यातील दुसऱ्या क्रमांकाचे सर्वाधिक तापमान होते. सध्या हवेमध्ये प्रचंड आर्द्रता असल्यामुळे गुरुवारी मुंबई शहराचे तापमान ३६.९ जरी नोंदवले गेले असले तरी जणू ४० अंश तापमान असल्यासारखे वाटत होते. कमाल तापमानात वाढ आणि आर्द्रतायुक्त हवा यामुळे १४ मेपर्यंत मुंबई, ठाणे आणि संपूर्ण कोकणात उष्णतेमुळे अस्वस्थता जाणवण्याची शक्यता आहे.