Maharashtra Flood : पूरग्रस्तांना दिलासा.. सरकारकडून १० हजारांची तातडीची मदत, अजित पवारांची विधानसभेत घोषणा

अजित पवारांनी जाहीर केलं की, अतिवृष्टीमुळे बाधित व्यक्तींना स्वस्त धान्य दुकानाच्या माध्यमातून मोफत धान्य पुरवलं जाणार आहे. यासाठी स्वस्त धान्याच्या दुकानात पुरेसे धान्य पोहोचवण्याच्या सूचना प्रशासनालाआजच देण्यात आल्या आहेत.

रोगराई पसरू नये यासाठी योग्य ती फवारणी करण्याच्या सूचना प्रशासनाला दिल्या आहेत. स्वच्छ पाणी पुरवठा करण्याच्या सूचना दिल्या आहे. पूरग्रस्तांना तातडीने १० हजार रुपयांची मदत दिली जाणार आहे.

नद्यांना व नाल्यांना आलेल्या पुरामुळे रस्ते वाहून गेल्याने ज्या गावांचा संपर्क तुटला आहे,तिथे तातडीने रस्ते दुरुस्ती करण्याचे निर्देश सार्वजनिक बांधकाम विभागाला दिल्याचे अजित पवार यांनी सांगितले.

अजित पवार म्हणाले की, पुराचं पाणी घरात शिरून ज्या विद्यार्थ्यांचे शालेय साहित्य, वह्या, पुस्तके खराब झाली आहेत, त्यांना साहित्य उपलब्ध करुन देण्याच्या सूचनाही शिक्षण विभागाला दिल्या आहेत.