देशीकट्टा दाखवून कार अडवली, बाहेर येताच झाडल्या गोळ्या; नागपुरात दिवसाढवळ्या कुख्यात गुंडाची हत्या

पवन धीरज हिरणवार (वय, २८) असे हत्या झालेल्या तरुणाचे नाव आहे. पवन हा नागपूर येथील काचीपुरा येथे वास्तव्यास होता. तर, शैलेश उर्फ बंटी हिरणवार (वय, ३१) असे जखमी झालेल्या तरुणाचे नाव आहे. पवन, शैलेश हे आपल्या इतर तीन मित्रांसह कारने बाभूळखेडा येथील पंचमुख हनुमान मंदिरात दर्शनाला गेले होते. त्यानंतर परत येत असताना दुचाकीवरून आलेल्या दोघांनी देशीकट्टा दाखवून त्यांची कार अडवली. पवन खाली उतरताच दोघांपैकी एकाने त्यांच्यावर गोळ्या झाडल्या. या घटनेत पवन याचा जागीच मृत्यू झाला. तर, शैलेशच्या कानाजवळ गोळी लागल्याने तो गंभीर जखमी झाला. हा संपूर्ण प्रकार खापरखेडा पोलीस ठाण्याच्या हद्दीत बाभूळखेडा- चिचोली यथे घडला.

पोलिसांनी दिलेल्या माहितीनुसार, पवनचा मृतदेह शवविच्छेदनासाठी मेयो हॉस्पिटलमध्ये पाठवण्यात आला. तर, शैलेश यालाही याच रुग्णालयात दाखल करण्यात आले असून त्याच्यावर उपचार सुरू आहेत. नागपूर येथील गँगस्टर शेखू खान याने पवन याची हत्या केल्याची शक्यता पोलिसांनी व्यक्त केली आहे. पवन आणि त्याच्या साथीदाराने दोन वर्षांपूर्वी शेखूचा भाऊ सरोज खानची चाकूने वार करून हत्या केली होती. भावाच्या खुनाचा बदला घेण्यासाठी शेखूने हा हल्ला केला असावा, असे बोलले जात आहे.

नागपुरात गेल्या काही महिन्यांपासून गुन्हेगारी वाढली असून पोलिसांचा वचक संपला आहे. गुन्हेगाराने तोंड वर काढले असून गेल्या काही दिवसांत एकापठोपाठ एक हत्याकांडच्या घटना उघडकीस आल्या आहेत. अशा घटनांमुळे शहरातील कायदा व सुव्यवस्था बिघडल्याचे चित्र समोर आले आहे. नागपुरातील गुन्हेगारी संपवण्यासाठी पोलीस प्रशासनाकडून कठोर पावले उचलली जात आहेत. मात्र, तरीही गुन्हेगारी कमी व्हायचे नाव घेईना. नागपूर बिहारच्या दिशेने वाटचाल करत असल्याचे स्थानिक लोक बोलत आहेत.