Dhananjay Munde News: राज्य सरकारने जाहीर केलेल्या पालकमंत्र्यांच्या यादीत राष्ट्रवादीचे नेते आणि अन्न व नागरी पुरवठा मंत्री धनंजय मुंडे यांचे नाव वगळण्यात आले. उपमुख्यमंत्री अजित पवार यांच्याकडे पवारांचा गृहजिल्हा असलेल्या पुण्याव्यतिरिक्त बीड जिल्ह्याची जबाबदारी देण्यात आली आहे. यावर धनंजय मुंडे यांनी सोशल मीडियाच्या माध्यमातून आपली प्रतिक्रिया दिली.
धनंजय मुंडे म्हणाले की, 'बीड जिल्ह्याच्या पालकमंत्रीपदी राज्याचे उपमुख्यमंत्री अजित पवार यांची नियुक्ती झाल्याबद्दल त्यांचे हार्दिक अभिनंदन व खूप खूप स्वागत. दादांच्या नेतृत्वात बीड जिल्ह्याच्या विकासाला पुणे जिल्ह्याप्रमाणे अधिकची गती आणि चालना मिळेल असा मला विश्वास आहे.
'बीड जिल्ह्यातील सध्या बदललेली राजकीय व सामाजिक स्थिती पाहता मी स्वतः ममुख्यमंत्री देवेंद्र फडणवीस यांच्याकडे बीड जिल्ह्याचे पालकमंत्रीपद अजितदादांनी स्वीकारण्याबाबत विनंती केली होती. त्यानुसार दादांनी बीड जिल्ह्याचे पालकमंत्री पद स्वीकारले, याचा मला आनंद वाटतो', असे धनंजय मुंडे म्हणाले.
पुढे धनंजय मुंडे म्हणाले की, ‘सद्यस्थितीत मला कोणत्याच जिल्ह्याच्या पालकमंत्री पदाची जबाबदारी नको, अशी माझी विनंतीही मान्य केल्याबद्दल देवेंद्र फडणवीस आणि अजित पवार आभार मानतो. मला दिलेल्या विभागाची जबाबदारी प्रामाणिकपणे पार पाडण्यासाठी मी सदैव प्रयत्नशील राहील.’
राज्यात ३६ जिल्हे आहेत. नक्षलग्रस्त गडचिरोली जिल्ह्याचे पालकमंत्री म्हणून मुख्यमंत्री देवेंद्र फडणवीस यांच्याकडे जबाबदारी सोपवण्यात आली आहे, तर उपमुख्यमंत्री अजित पवार यांच्याकडे पवारांचा गृहजिल्हा असलेल्या पुण्याव्यतिरिक्त बीड जिल्ह्याची जबाबदारी देण्यात आली आहे.शिवसेना पक्षप्रमुख एकनाथ शिंदे हे मुंबई शहरासह त्यांचा बालेकिल्ला असलेल्या ठाणे जिल्ह्याचे पालकमंत्री असतील. मुंडे यांच्यासह कॅबिनेट मंत्री दादाजी भुसे, दत्ता भरणे, भरत गोगावले, राज्यमंत्री इंद्रनील नाईक, योगेश कदम यांनाही एकही जिल्हा देण्यात आलेला नाही. भाजपचे प्रदेशाध्यक्ष चंद्रशेखर बावनकुळे यांच्याकडे नागपूर आणि अमरावतीचे पालकमंत्री पद सोपवण्यात आले आहे. आशिष शेलार यांची मुंबई उपनगराचे पालकमंत्री, तर मंगलप्रभात लोढा यांची सहपालकमंत्रिपदी नियुक्ती करण्यात आली आहे. शेलार आणि लोढा हे दोघेही मुंबईतील भाजपचे नेते आहेत.
रायगडच्या पालकमंत्रिपदी राष्ट्रवादीच्या आदिती तटकरे असतील, या पदावर शिवसेनेचे भरत गोगावले आहेत. गोगावले यांनी रायगडचे पालकमंत्री होण्यासाठी उत्सुक असल्याचे यापूर्वी सांगितले होते. साताऱ्याच्या पालकमंत्रीपदी शिवसेनेचे शंभूराज देसाई यांची वर्णी लागली आहे. साताऱ्यातील भाजपचे शिवेंद्रसिंह भोसले यांना लातूरचे पालकमंत्री करण्यात आले आहे. साताऱ्यातील भाजपचे जयकुमार गोरे यांना सोलापूरचे पालकमंत्री करण्यात आले आहे. राष्ट्रवादीचे मकरंद हे बुलडाण्याचे पालकमंत्री आहेत. धनंजय मुंडे यांच्या चुलत बहिणी असलेल्या भाजपच्या पंकजा मुंडे यांना जालना जिल्ह्याच्या पालकमंत्रिपदी विराजमान करण्यात आले आहे. चंद्रकांत पाटील यांच्याकडे सांगलीचे पालकमंत्री, तर भाजपचे आणखी एक नेते गिरीश महाजन यांच्याकडे नाशिकची जबाबदारी सोपवण्यात आली आहे.
शिवसेनेचे गुलाबराव पाटील यांना जळगावची जागा देण्यात आली आहे. गडचिरोलीचे मुख्यमंत्री फडणवीस यांच्यासह शिवसेनेचे आशिष जयस्वाल हे सहपालकमंत्री असतील. कोल्हापूरचे पालकमंत्री म्हणून प्रकाश आबिटकर आणि सहपालकमंत्री पदी माधुरी मिसाळ असतील. राधाकृष्ण विखे पाटील (अहिल्यानगर), हसन मुश्रीफ (वाशीम), गणेश नाईक (पालघर), संजय राठोड (यवतमाळ), उदय सामंत (रत्नागिरी), जयकुमार रावल (धुळे), अतुल सावे (नांदेड), अशोक उईके (चंद्रपूर), माणिकराव कोकाटे (नंदुरबार), नरहरी झिरवाळ (हिंगोली), संजय सावकारे (भंडारा), संजय शिरसाट (छत्रपती संभाजीनगर), प्रताप सरनाईक (धाराशिव), नितेश राणे (सिंधुदुर्ग), आकाश फुंडकर (अकोला), बाबासाहेब पाटील (गोंदिया), मेघना बोर्डीकर (परभणी) .
संबंधित बातम्या