लग्नाच्या एक दिवस आधी १९ वर्षीय तरुणी घरातून बेपत्ता; अन् ७ दिवसानंतर..

अमरावती - प्रियकराने लग्नास नकार दिल्याने प्रेयसीने गळफास घेत आत्महत्या केल्याची घटना ताजी असतानाच आणखी एक धक्कादायक घटना समोर आली आहे. लग्न ठरलेल्या एका नियोजित वधूचा मृतदेह आढळून आल्याने जिल्ह्यात खळबळ उडाली आहे. साक्षी संजय नेवारे असे मृत तरुणीचे नाव आहे.

पोलिसांनी दिलेल्या माहितीनुसार, अमरावती जिल्ह्यातील एका १९ वर्षीय तरुणीचे ६ जुलैला लग्न ठरलेले होते. मात्र, ही नियोजित वधू ५ जुलैच्या सायंकाळपासून घरापासून बेपत्ता झाली होती. यानंतर मंगळवारी तिचा मृतदेह शेतातील विहिरीत आढळल्याने एकच खळबळ उडाली आहे. तर माझ्या मुलीची हत्या झाली आहे, असा आरोप मृत तरुणीचे वडील संजय नेवारे यांनी केला आहे. याप्रकरणी त्यांनी शिरजगाव कसबा पोलिसांकडे तक्रारही दाखल केली आहे.

संजय सदाशिव नेवारे हे शिरजगाव कसबामध्ये गोवारीपुरा भागात राहतात. त्यांना एक मुलगी व मुलगा आहे. त्यांची मुलगी साक्षी ५ जुलैला सायंकाळी ४ ते ५ दरम्यान घराबाहेर गेली. तिचा मोबाइल घरीच होता. त्यामुळे ती कुठेतरी बाहेर गेली असेल, असा कुटुंबीयांचा समज झाला. मात्र, त्यानंतर ती परत आलीच नाही. त्याच दिवसापासून ती दिसून न आल्यामुळे संजय नेवारे यांनी शिरजगाव पोलिसात तक्रार दाखल केली. नातेवाइकांकडूनही तिचा शोध घेण्यात आला.

दरम्यान, १२ जुलैला गोवारीपुराच्या मागील बाजूस असलेल्या एका शेतातील विहिरीत तिचा मृतदेह आढळला. यानंतर एकच खळबळ उडाली. मृतदेहाच्या अंगावर अर्धवट कपडे व जीभ बाहेर आली असल्याचे पंचनामा करताना आढळले. याप्रकरणी मुलीच्या वडिलांच्या तक्रारीवरून गुन्ह्याची नोंद करण्यात आली आहे.