viral video : नाना पटोले यांनी काँग्रेस कार्यकर्त्याकडून पाय धुवून घेतले; व्हिडिओ वाऱ्यासारखा व्हायरल, पाहाच!

अकोला जिल्ह्यातील वडगाव इथला हा व्हिडिओ आहे. पक्षाच्या एका कार्यकर्त्यानं आयोजित केलेल्या वाढदिवसाच्या सोहळ्यात सहभागी होण्यासाठी पटोले अकोल्याला गेले होते. तिथून परतताना त्यांचे पाय चिखलानं माखले. ते पाहून एक कार्यकर्ता पुढं आला आणि त्यांचे पाय धुवू लागला. पटोले हे त्यावेळी कारमध्ये बसले होते. त्यांनी कुठलाही संकोच न बाळगता पाय त्याच्या पुढं धरले होते. पटोले यांना यात काहीही चुकीचं वाटल्याचं व्हिडिओत दिसत नाही. हा सगळा प्रकार कॅमेऱ्यात कैद झाला.

हेही वाचा: मोदींचा शपथविधी सुरू असताना ममता बॅनर्जी घरातली लाइट घालवून अंधारात बसल्या होत्या! कारण काय?

पटोले यांच्या या वागणुकीमुळं त्यांच्यासह काँग्रेसवर टीकेची झोड उठली आहे. भाजपनं या घटनेचा व्हिडिओ सोशल मीडियावर व्हायरल करून काँग्रेसवर तोफ डागली आहे. 'काँग्रेस नेहमीच जनतेला पायाची धूळ समजत आली आहे. नाना पटोले यांनी चिखलात माखलेले पाय कार्यकर्त्याला धुवायला लावले. काँग्रेसची ही सरंजामी वृत्ती त्यांच्या नसांनसांत भिनली आहे. यांच्या हातात सत्ता गेली तर गरिबांना दिवस ‘हालात’ काढावे लागतील याचा हा पुरावा आहे, असं महाराष्ट्र भाजपनं म्हटलं आहे.

हेही वाचा: विधानपरिषदेच्या ११ जागांसाठी निवडणूक कार्यक्रम जाहीर; ‘या’ दिवशी मतदान आणि मतमोजणी

भाजपचे प्रवक्ते शेहजाद पूनावाला यांनी एक्स अकाऊंटवरून या घटनेचा निषेध केला आहे. 'काँग्रेसची ही शेहजादा मानसिकता आहे. ते जनतेला आणि कामगारांना गुलाम समजतात आणि स्वतः राजा-राण्यांसारखे वागतात. विरोधी पक्षात असताना हे लोक असं वागत आहेत, सत्तेत असताना काय होईल याची कल्पना येऊ शकते, असं पूनावाला यांनी म्हटलं आहे. जनतेचा अपमान केल्याबद्दल नाना पटोले आणि काँग्रेसनं माफी मागितली पाहिजे, अशी मागणी त्यांनी केली.

हेही वाचा: भाजपचे सुजय विखे यांना ईव्हीएमवर संशय; चौकशीच्या मागणीसाठी निवडणूक आयोगाच्या कार्यालयात दाखल

नाना पटोले काय म्हणाले?

'प्रसार माध्यमामधून माझ्याबद्दलचा एक व्हिडिओ दाखवून मला जाणीवपूर्वक बदनाम केले जात आहे, परंतु त्यात काही तथ्य नाही. अकोला जिल्ह्याच्या दौऱ्यावर असताना संत गजानन महाराजांची पालखी तिथं आली होती, मी वारकरी संप्रदायाचा असून गजानन महाराजांचं दर्शन घेण्यास गेलो असताना चिखलानं पाय माखले होते, एका कार्यकर्त्यांनं पायावर पाणी टाकलं आणि मी माझ्या हातानं माझे पाय धुतले, यात गैर काय आहे. मी शेतकरी माणूस आहे, मला चिखलाची सवय आहे, जे काही झालं ते दिवसाच्या स्वच्छ प्रकाशात झालं आहे. त्यात लपवण्यासारखं काहीच नाही, अशी प्रतिक्रिया पटोले यांनी दिली आहे.