मुंबईमध्ये कधीपर्यंत धावणार बुलेट ट्रेन, कुठंपर्यंत पोहोचलं काम?; रेल्वेमंत्री वैष्णव यांनी सांगितलं

अश्विनी वैष्णव यांनी सांगितले की, सर्वात खालच्या 'बी ३ बेसमेंट लेव्हल'चे काम पूर्ण झाले आहे. बीकेसीतील बुलेट ट्रेनच्या पहिल्या स्थानकाचे बांधकाम वेगाने सुरू आहे. स्थानकाच्या भिंतीचे काम सुरू झाले असून बोगद्याचे कामही वेगाने सुरू आहे. भुयारी मार्गाच्या पलीकडे भूसंपादनानंतर महाराष्ट्र विभागातील सर्व बांधकामे वेगाने सुरू आहेत. मंत्री म्हणाले की, बीकेसी स्थानकात बहुमजली इमारतीचे नियोजन करण्यात आले आहे.

बुलेट ट्रेन स्टेशनमध्ये खोदकाम ७६ टक्के पूर्ण -

एनएचएसआरसीएलच्या अधिकाऱ्यांनी सांगितले की बीकेसी बुलेट ट्रेन स्टेशनवर सुमारे ७६ टक्के खोदाईचे काम पूर्ण झाले आहे. पाहणीनंतर मंत्री पुण्याला रवाना झाले, तेथे त्यांनी सायंकाळी लांब पल्ल्याच्या दोन गाड्यांना हिरवा झेंडा दाखवला. मुख्यमंत्री देवेंद्र फडणवीस यांनी २०२८ पर्यंत महत्त्वाकांक्षी बुलेट ट्रेन प्रकल्प कार्यान्वित होईल, अशी घोषणा केली होती. पनवेल रेल्वे स्थानकाला भेट दिल्यानंतर वैष्णव यांनी महत्त्वाचे विधान केले. आगामी दशकांच्या गरजा पूर्ण करण्यासाठी मुंबईची रेल्वे क्षमता वाढविणे आणि स्थानकांचे आधुनिकीकरण करण्याच्या सरकारच्या दीर्घकालीन दृष्टीकोनाची त्यांनी माहिती दिली.